ബംഗളൂരു:കര്ണാടകയുടെ തലസ്ഥാന നഗരിയെ അന്താരാഷ്ട്ര ഗുണനിലവാരത്തോടും സൗകര്യങ്ങളോടും കൂടിയ നഗരമാക്കി മാറ്റാന് ഒരുങ്ങി സര്ക്കാര്. നഗരത്തില് ഇപ്പോഴുള്ള പ്രശ്നങ്ങള്ക്ക് പ്രധാന കാരണം മുന്പ് ഭരിച്ച സര്ക്കാരുകളുടെ പരാജയമാണെന്ന് മുഖ്യമന്ത്രി പറഞ്ഞു.
ബംഗളൂരു സ്ഥാപകന് നാദപ്രഭു കെമ്പഗൗഡയുടെ 513ാമത് ജന്മവാര്ഷികാഘോഷ പരിപാടിയില് സംസാരിക്കുകയായിരുന്നു അദ്ദേഹം. പരിപാടിയുടെ ഭാഗമായി സ്കൂള് കുട്ടികള്ക്ക് സ്കോളര്ഷിപ്പ് വിതരണവും നടത്തി. റിംഗ് റോഡിന് അനുബന്ധമായ റോഡിന്റെ പണികള്ക്കായുള്ള ടെന്ഡറുകള് സ്വീകരിച്ചെന്നും ഈ വര്ഷത്തില് തന്നെ റോഡിന്റെ പണി ആരംഭിക്കുമെന്നും ബൊമ്മൈ വ്യക്തമാക്കി.
ബംഗളൂരു സബ്അര്ബന് റെയില് പ്രോജക്ടിന്റെ തറക്കല്ലിടല് കര്മ്മം പ്രധാനമന്ത്രി നരേന്ദ്ര മോദി നിര്വഹിച്ചതായും പറഞ്ഞു. മെട്രോ സര്വീസുകളും വിപുലീകരിക്കും. നഗരത്തിന്റെ അടിസ്ഥാന സൗകര്യ വികസനത്തിനാണ് കൂടുതല് പ്രാധാന്യം കൊടുക്കുകയെന്നും വ്യക്തമാക്കി. പ്രാരംഭ ഘട്ടത്തില് 6,000 കോടി രൂപയുടെ ‘നഗരോത്തന പ്രോജക്ടുകള്’ ആരംഭിച്ചതായി അറിയിച്ചു.
ഭൂഗര്ഭ ജല സംവിധാനങ്ങളുടെ നിര്മാണം, റോഡുകളുടെ നിര്മാണം, കാവേരി ജലസേചനം തുടങ്ങിയവയില് മുന് സര്ക്കാരുകള് കാണിച്ച അലംഭാവമാണ് ബംഗളൂരുവിനെ മോശമാക്കിയതെന്നും ബൊമ്മൈ പറഞ്ഞു.നഗരത്തിലെ ട്രാഫിക് നിയന്ത്രണവിധേയമാക്കുമെന്നും സാറ്റ്ലൈറ്റ് നഗരങ്ങള് വികസിപ്പിക്കുമെന്നും കൂട്ടിച്ചേര്ത്തു.
