ചിരഞ്ജീവി ആരാധകർ ഏറെ കാത്തിരിക്കുന്ന ചിത്രമാണ് ഗോഡ്ഫാദര്‍. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്ത് വലിയ വിജയമായ ലൂസിഫറിന്റെ തെലുങ്ക് റീമേക്കാണ് ചിരഞ്ജീവി നായകനാകുന്ന ഗോഡ്ഫാദര്‍. അതുകൊണ്ട് തന്നെ ലൂസിഫർ ആരാധകരും ഏറെ കാത്തിരിക്കുന്ന ചിത്രമാണ് ഗോഡ്ഫാദര്‍. ആരാധകർക്ക് ആവേശത്തോടെ കാത്തിരിക്കാനുള്ള വാർത്തയാണ് സിനിമയുടെ അണിയറ പ്രവർത്തകർ പുറത്ത് വിട്ടിരിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റർ ഉടനെ പുറത്ത് വിടുമെന്ന് അണിയറ പ്രവർത്തകർ അറിയിച്ചു.
ജൂലൈ 4 തിങ്കളാഴ്ച വൈകിട്ട് 5.45ന് ചിത്രത്തിന്റെ ഫസ്റ്റ് ലുക്ക് പുറത്തുവിടും. ചിരഞ്ജീവിയുടെ അഭിനയ ജീവിതത്തിലെ 153-ാം ചിത്രമാണ് ഗോഡ്ഫാദർ. മഴയിൽ കറുത്ത കുടകൾക്കിയയിൽ കറുത്ത അംബാസിഡർ കാറിന്റെ ചിത്രം പുറത്ത് വിട്ടുകൊണ്ടാണ് ഉടൻ സിനിമയുടെ ഫസ്റ്റ്ലുക്ക് പോസ്റ്റർ വരുമെന്ന് അറിയിച്ചിരിക്കുന്നത്. ഇതോടെ ചിരഞ്ജീവി ആരാധകർ ആവേശത്തോടെ കാത്തിരിക്കുകയാണ്. ബോളിവുഡ് സൂപ്പര്‍താരം സല്‍മാന്‍ ഖാനും സിനിമയിൽ പ്രധാന വേഷത്തിലെത്തുന്നു എന്നതും കൗതുകമുണർത്തുന്നുണ്ട്.
മോഹന്‍ രാജയാണ് ചിത്രം സംവിധാനം ചെയ്യുന്നത്. കോനിഡേല പ്രൊഡക്ഷന്‍ കമ്പനിയും സൂപ്പര്‍ ഗുഡ് ഫിലിംസും ചേര്‍ന്നാണ് ചിത്രം നിർമ്മിച്ചിരിക്കുന്നത്. നയന്‍താരയാണ് സിനിമയിൽ നായിക. നീരവ് ഷായാണ് ചിത്രത്തിന്റെ ഛായാഗ്രാഹകന്‍. എസ്.തമൻ സംഗീത സംവിധാനവും പ്രഭുദേവ നൃത്തസംവിധാനവും നിര്‍വ്വഹിച്ചിരിക്കുന്നു.
Comments