‘റോക്കട്രി: ദി നമ്പി ഇഫക്റ്റിനെ വാനോളം പുകഴ്ത്തി നടൻ രജനീകാന്ത്. ശാസ്ത്രഞ്ജന് നമ്പി നാരായണന്റെ ജീവിത കഥ അടിസ്ഥാനമാക്കി നടൻ മാധവനെ നായകനാക്കി ആര്.മാധവന് സംവിധാനം ചെയ്ത ചിത്രമാണ് ‘റോക്കട്രി: ദി നമ്പി ഇഫക്റ്റ്’. ഭാരതത്തിന്റെ ബഹിരാകാശ ഗവേഷണ വികസനത്തിനായി കെട്ടുകഥകളെ വെല്ലുന്ന കഷ്ടപ്പാടുകളും ത്യാഗങ്ങളുമാണ് ജീവിതത്തിൽ നമ്പി നാരായണന് നേരിടേണ്ടി വന്നത്. ആ ചരിത്ര സംഭവങ്ങളെ ചലച്ചിത്രമാക്കിയപ്പോൾ പ്രേക്ഷകർ ഹൃദയം കൊണ്ടാണ് സ്വീകരിച്ചത്. ഇപ്പോൾ സൂപ്പർസ്റ്റാറും അഭിനന്ദനം അറിയിച്ച് വന്നിരിക്കുകയാണ്.
‘റോക്കട്രി’ തീർച്ചയായും എല്ലാവരും കണ്ടിരിക്കണം, പ്രത്യേകിച്ച് യുവാക്കൾ. പത്മഭൂഷൺ നമ്പി നാരായണന്റെ ചരിത്രം വളരെ യാഥാർത്ഥ്യബോധത്തോടെയാണ് നടൻ മാധവൻ അവതരിപ്പിച്ചതെന്നും ഹൃദയം തുറന്നുള്ള അഭിനന്ദനം പങ്കുവെച്ച് രജനീകാന്ത് ട്വിറ്ററിൽ കുറിച്ചു. ചിത്രത്തില് നമ്പി നാരായണനായി വേഷപ്പകർച്ച നടത്തിയ മാധവന്റെ ആത്മസമർപ്പണം ഏറെ പ്രശംസിക്കപ്പെട്ടിരുന്നു. തീയറ്റർ റിലീസിന് മുമ്പ് ചിത്രം കാന് ഫിലിം ഫെസ്റ്റിവലില് പ്രദര്ശിപ്പിച്ചിരുന്നു. മലയാളത്തിന് പുറമെ തമിഴ്, ഹിന്ദി, ഇംഗ്ലീഷ്, തെലുഗു, കന്നഡ ഭാഷകളിലും അറബിക്, ഫ്രഞ്ച്, സ്പാനീഷ്, ജര്മ്മന്, ചൈനീസ്, റഷ്യന്, ജാപ്പാനീസ് തുടങ്ങിയ അന്താരാഷ്ട്ര ഭാഷകളിലുമായിട്ടാണ് ചിത്രം റിലീസിനെത്തിയത്.
സിമ്രാന് ആണ് ചിത്രത്തില് മാധവന്റെ നായികയായി എത്തുന്നത്. ഇരുവരും പതിനഞ്ച് വര്ഷത്തിന് ശേഷമാണ് സിനിമയില് ഒന്നിക്കുന്നത്. ബോളിവുഡ് താരം ഷാരുഖ് ഖാനും തമിഴ് നടൻ സൂര്യയും പ്രധാന വേഷങ്ങളിൽ ചിത്രത്തിൽ പ്രത്യക്ഷപ്പെടുന്നുണ്ട്. 100 കോടിക്ക് മുകളിലാണ് ചിത്രത്തിന്റെ ചിലവ്. ആര്. മാധവന്റെ ട്രൈ കളര് ഫിലിംസും മലയാളിയായ ഡോക്ടര് വര്ഗീസ് മൂലന്റെ വര്ഗീസ് മൂലന് പിക്ചര്സിന്റെയും ബാനറിലാണ് ചിത്രം റിലീസ് ചെയ്തത്.
