ന്യൂഡൽഹി: കേന്ദ്രമന്ത്രി മുക്താർ അബ്ബാസ് നഖ് വി രാജിവെച്ചു. അദ്ദേഹത്തിന്റെ രാജ്യസഭാ കാലാവധി വ്യാഴാഴ്ച അവസാനിക്കാനിരിക്കെയാണ് രാജി. മന്ത്രിയെന്ന നിലയിൽ നഖ് വി രാജ്യത്തിനും ജനങ്ങൾക്കും നൽകിയ സംഭാവനകളെ പ്രധാനമന്ത്രി അഭിനന്ദിച്ചു. ബുധനാഴ്ച ചേർന്ന മന്ത്രിസഭാ യോഗത്തിലാണ് അദ്ദേഹം നഖ് വിയുടെയും വ്യാഴാഴ്ച രാജ്യസഭാ കാലാവധി പൂർത്തിയാക്കുന്ന ജെഡിയു പ്രതിനിധിയും കേന്ദ്രമന്ത്രിയുമായ ആർസിപി സിംഗിന്റെയും സേവനങ്ങളെ പുകഴ്ത്തിയത്.
മന്ത്രിസഭാ യോഗത്തിന് ശേഷം നഖ് വി ബിജെപി ദേശീയ അദ്ധ്യക്ഷൻ ജെ.പി നദ്ദയുമായി കൂടിക്കാഴ്ച നടത്തിയിരുന്നു. ഇതിന് ശേഷമാണ് അദ്ദേഹം രാജി നൽകിയത്. മുതിർന്ന ബിജെപി നേതാവാണ് മുക്താർ അബ്ബാസ് നഖ്വി. ബിജെപിയുടെ രാജ്യസഭാ ഉപനേതാവ് കൂടിയാണ് അദ്ദേഹം. ന്യൂനപക്ഷ കാര്യ വകുപ്പാണ് നഖ്വി കൈകാര്യം ചെയ്തിരുന്നത്.
എൻഡിഎ ഘടകകക്ഷിയായ ജെഡിയുവിന്റെ പ്രതിനിധിയും കേന്ദ്രമന്ത്രിയുമായ ആർസിപി സിംഗിന്റെയും രാജ്യസഭാ കാലാവധി അവസാനിച്ചിരുന്നു. അദ്ദേഹവും രാജി നൽകിയേക്കുമെന്ന് റിപ്പോർട്ടുകൾ ഉണ്ട്.
