തിരുവനന്തപുരം: രാജ്യത്തോടും ഭരണഘടനയോടുമുളള സിപിഎം നേതാക്കളുടെ സമീപനത്തെ വിമർശിച്ച് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. മന്ത്രി സജി ചെറിയാനോട് പാർട്ടിയും മുഖ്യമന്ത്രിയും ഒന്നും രാജി ആവശ്യപ്പെട്ടില്ലെന്നാണ് പറഞ്ഞത്. അതു ഏറ്റവും ഗൗരവമുളള കാര്യമാണെന്ന് കെ. സുരേന്ദ്രൻ പറഞ്ഞു.
ഭരണഘടനയ്ക്കെതിരെ ഇത്രയും വലിയ ഒരു പരാമർശം നടത്തിയിട്ട് പാർട്ടി അദ്ദേഹത്തെ ശാസിച്ചില്ല, അദ്ദേഹത്തോട് രാജി ആവശ്യപ്പെട്ടില്ലെന്ന് പറഞ്ഞാൽ സിപിഎമ്മിന് രാജ്യത്തോടുളള കൂറ് എന്താണെന്നും ഈ ഭരണഘടനയോടുളള കൂറ് എന്താണെന്നുമുളളതിന് തെളിവാണ് അതെന്ന് കെ സുരേന്ദ്രൻ പറഞ്ഞു. ഇന്ത്യൻ ഭരണഘടനയെക്കാളും ഈ രാജ്യത്തെക്കാളും അവർക്ക് കൂറ് ചൈനയോടും മറ്റ് വിദേശരാജ്യങ്ങളോടുമാണ്. അത് ഇപ്പോ തെളിഞ്ഞുവെന്നും അദ്ദേഹം ചൂണ്ടിക്കാട്ടി.
സജി ചെറിയാൻ സ്വമേധയാ രാജിവെച്ചതാണെങ്കിൽ മുഖ്യമന്ത്രി അടക്കമുളള ആളുകൾക്ക് ഈ രാജ്യത്തിന്റെ ഭരണഘടനയിൽ വിശ്വാസമില്ലെന്നാണ് അവർ തെളിയിക്കുന്നത്. ഇന്ത്യാരാജ്യം എന്ന കാഴ്ചപ്പാടിനേ അവർ എതിരാണ്. ഭരണഘടനയ്ക്കെതിരായ നിലപാടാണ് അവർ എപ്പോഴും സ്വീകരിക്കുന്നതെന്നും കെ സുരേന്ദ്രൻ ചൂണ്ടിക്കാട്ടി.
സജി ചെറിയാൻ മന്ത്രിസ്ഥാനം മാത്രമല്ല എംഎൽഎ സ്ഥാനവും രാജിവെയ്ക്കണമെന്ന് കെ. സുരേന്ദ്രൻ നേരത്തെ ആവശ്യപ്പെട്ടിരുന്നു. രാജി പ്രഖ്യാപനം നടത്തിയപ്പോൾ സ്വമേധയാ ആണ് താൻ രാജിവെയ്ക്കുന്നതെന്ന് സജി ചെറിയാൻ തന്നെ വ്യക്തമാക്കുകയായിരുന്നു. മുഖ്യമന്ത്രിയോ പാർട്ടിയോ തന്നോട് രാജി ആവശ്യപ്പെട്ടിട്ടില്ലെന്നും അദ്ദേഹം പറഞ്ഞിരുന്നു.
Comments