ന്യൂഡൽഹി: ഐസിസി ടെസ്റ്റ് ബാറ്റിംഗ് റാങ്കിംഗിൽ ഇന്ത്യൻ വിക്കറ്റ് കീപ്പർ ബാറ്റ്സ്മാൻ ഋഷഭ് പന്തിന് മുന്നേറ്റം. കരിയറിലെ ഏറ്റവും മികച്ച സ്ഥാനമായ അഞ്ചിലേക്കാണ് പന്ത് ഉയർന്നത്. ഫോം നഷ്ടമായ മുൻ ഇന്ത്യൻ ക്യാപ്ടൻ വിരാട് കോഹ്ലി, ആറ് വർഷത്തിനിടെ ആദ്യമായി ആദ്യ പത്തിൽ നിന്ന് പുറത്തായി. പതിമൂന്നാം സ്ഥാനത്തേക്കാണ് വിരാട് കോഹ്ലി പിന്തള്ളപ്പെട്ടത്.
ഇംഗ്ലണ്ടിനെതിരായ കഴിഞ്ഞ മത്സരത്തിലെ രണ്ട് ഇന്നിംഗ്സുകളിലും ഋഷഭ് പന്ത് മികച്ച പ്രകടനം കാഴ്ച വെച്ചിരുന്നു. ഒന്നാം ഇന്നിംഗ്സിൽ 146 റൺസ് നേടിയ പന്ത്, രണ്ടാം ഇന്നിംഗ്സിൽ 57 റൺസും നേടിയിരുന്നു. കഴിഞ്ഞ ആറ് ഇന്നിംഗ്സുകളിൽ നിന്നായി പന്ത് രണ്ട് സെഞ്ച്വറികളും മൂന്ന് അർദ്ധ സെഞ്ച്വറികളും നേടിയിട്ടുണ്ട്.
കൊറോണ ബാധയെ തുടർന്ന് കഴിഞ്ഞ മത്സരത്തിൽ കളിക്കാതിരുന്ന ഇന്ത്യൻ ക്യാപ്ടൻ രോഹിത് ശർമ്മയും റാങ്കിംഗിൽ ഒരു സ്ഥാനം പിന്നോട്ട് ഇറങ്ങി. ഒൻപതാം സ്ഥാനത്താണ് രോഹിത് ശർമ്മ ഇപ്പോൾ.
ഇംഗ്ലണ്ട് ബാറ്റർ ജോ റൂട്ടാണ് റാങ്കിംഗിൽ ഒന്നാമത്. ഓസ്ട്രേലിയൻ താരങ്ങളായ മാർനസ് ലെബൂഷെയ്നും സ്റ്റീവ് സ്മിത്തുമാണ് രണ്ടും മൂന്നും സ്ഥാനങ്ങളിൽ.
Comments