ആരും ഒന്ന് കിടന്നുറങ്ങാൻ ആഗ്രഹിച്ച് പോകുന്ന ഒരു ഹോട്ടൽ റൂമിന്റെ ചിത്രമാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. ഹോട്ടൽ ഉടമയ്‌ക്ക് വാടക കൊടുക്കേണ്ടതില്ലെന്നതാണ് ഈ റൂമിന്റെ പ്രത്യേകത. അതുകൊണ്ട് കൂടിയാണ് അതിമനോഹരമെന്ന് തോന്നുന്ന ഈ റൂമിന്റെ ചിത്രം ഇന്റർനെറ്റ് ലോകം ഏറ്റെടുത്തത്. എന്നാൽ ഫ്രീയായി മുറി നൽകണമെങ്കിൽ ഹോട്ടലുടമയ്‌ക്ക് ഒരു നിബന്ധനയുണ്ട്.
സ്പാനിഷ് ദ്വീപായ ഇബീസയിലാണ് ഈ ഹോട്ടലുള്ളത്. പാരഡൈസോ ആർട്ട് ഹോട്ടൽ എന്നാണിതിന്റെ പേര്. ഹോട്ടലിലേക്ക് കയറി വരുന്ന ഭാഗത്ത് തന്നെയാണ് ഈ മുറിയുള്ളത്. ഇനി ഒരാൾക്കോ ഒരു കുടുംബത്തിനോ ഈ മുറി സൗജന്യമായി നൽകണമെങ്കിൽ ഹോട്ടൽ ഉടമ പറയുന്ന നിബന്ധനയിതാണ്.
വാതിലുകളും ചുമരുകളും ഈ മുറിക്ക് വെച്ചുനൽകാൻ ആവശ്യപ്പെടരുതെന്നാണ് നിബന്ധന. അതായത്. അത്യധികം മനോഹരമായ ഈ ഹോട്ടൽ മുറിക്ക് ചുമരുകളില്ല, അതുകൊണ്ട് തന്നെ വാതിലുമില്ല. ഹോട്ടലിന്റെ മുൻവശത്ത് തന്നെയാണ് ഈ മുറി ഉള്ളത് എന്നതിനാൽ കയറിവരുന്ന എല്ലാവർക്കും മുറി മുഴുവനായും കാണാവുന്നതാണ്.
ഗ്ലാസുകൊണ്ടുള്ള സുതാര്യമായ ചുമരാണ് ഈ മുറിക്ക് ചുറ്റുമുള്ളത്. സ്വകാര്യത പ്രശ്‌നമല്ലാത്തവർക്ക് മുറിയിൽ സ്വസ്ഥമായി കഴിയാവുന്നതാണ്. ഒരു ദിവസത്തെ മുറിവാടകയാണ് ഹോട്ടൽ സൗജന്യമായി നൽകുക. പ്രമുഖ ടിക്ക്‌ടോക്കറായ ഒളിമ്പിയ ആൻലി ഈ ഹോട്ടലിലെത്തുകയും ഒരു ദിനം ഈ മുറിയിൽ കഴിയുകയും ചെയ്തതിന്റെ അനുഭവം പങ്കുവെച്ചിരുന്നു. എന്നിരുന്നാലും ഇതൊരു മുറിയാണോയെന്നും വെറുതയല്ല സൗജന്യമായി നൽകുന്നതെന്നുമാണ് സോഷ്യൽ മീഡിയയിൽ ഉയരുന്ന വിമർശനം.
