മലയാളികളുടെ പ്രിയ ഗായിക മഞ്ജരി ഗുരുവായൂരപ്പന്റെ അനുഗ്രഹം തേടി ക്ഷേത്ര തിരുനടയിൽ എത്തി. വിവാഹ ശേഷം ആദ്യമായാണ് മഞ്ജരി ഗുരുവായൂരിലെത്തുന്നത്. ഗുരുവായൂരപ്പന്റെ അനുഗ്രഹം ഞങ്ങൾക്ക് ഉണ്ടാകട്ടെയെന്ന അടിക്കുറിപ്പോടെ മഞ്ജരി പങ്കുവെച്ച വീഡിയോയും പ്രേക്ഷക ശ്രദ്ധ നേടുകയാണ്. മഞ്ജരിയും ഭർത്താവ് ജെറിനും ഗുരുവായൂരിലെത്തി ദർശനം നടത്തുന്നതാണ് വീഡിയോയിലുള്ളത്.
ജെറിൻ ആദ്യമായാണ് ഗുരുവായൂരിലെത്തുന്നതെന്ന് മഞ്ജരി പറഞ്ഞു. ക്ഷേത്രവും ക്ഷേത്ര പരിസരവുമെല്ലാം അദ്ദേഹത്തെ കാണിക്കാൻ കഴിഞ്ഞതിൽ അതീവ സന്തോഷമുണ്ടെന്നായിരുന്നു മഞ്ജരിയുടെ പ്രതികരണം. ”അകത്തേക്ക് പ്രവേശിക്കാൻ കഴിഞ്ഞില്ലെങ്കിലും ജെറിൻ പുറത്തുനിന്ന് തൊഴുതു. ഞാൻ അകത്തേക്ക് കയറി. ഞങ്ങൾ രണ്ട് പേർക്കും വേണ്ടി ഗുരുവായൂരപ്പനോട് പ്രാർത്ഥിച്ചു”മഞ്ജരി ഇൻസ്റ്റഗ്രാമിൽ കുറിച്ചു.
ജൂൺ 24നായിരുന്നു മഞ്ജരിയും ഭർത്താവ് ജെറിനും വിവാഹിതരായത്. തിരുവനന്തപുരത്ത് വെച്ച് അടുത്ത സുഹൃത്തുക്കളുടെയും ബന്ധുക്കളുടെയും സാന്നിധ്യത്തിലായിരുന്നു വിവാഹം. ബെംഗളൂരുവിലെ സ്വകാര്യ കമ്പനിയിൽ ജോലിക്കാരനായ ജെറിൻ പത്തനംതിട്ട സ്വദേശിയാണ്.
Comments