മലപ്പുറം: നിലമ്പൂരിൽ നിരവധിയാളുകളെ കടിച്ച് പരിക്കേൽപ്പിച്ച തെരുവുനായ ചത്തു. പേവിഷ ബാധയുണ്ടെന്ന സംശയത്താൽ നായയെ പിടികൂടി നിരീക്ഷണത്തിലാക്കിയിരുന്നു. ഇതിനിടെയാണ് നായ ചത്തത്.
കഴിഞ്ഞ ദിവസങ്ങളിൽ നിലമ്പൂരിനെ വിറപ്പിച്ച ഈ നായയെക്കുറിച്ച് നിരവധി വാർത്തകൾ പുറത്തുവന്നിരുന്നു. 16 പേരെയായിരുന്നു നായ കടിച്ചു പരിക്കേൽപ്പിച്ചത്. പേവിഷ ബാധയുണ്ടോയെന്ന് സ്ഥിരീകരിക്കാൻ ചത്ത തെരുവുനായയുടെ സാമ്പിൾ പരിശോധനക്ക് അയക്കുമെന്ന് അധികൃതർ വ്യക്തമാക്കി.
നിലമ്പൂരിനെ ഒന്നരദിവസത്തോളമായിരുന്നു നായ പ്രതിസന്ധിയിലാക്കിയിരുന്നത്. അഞ്ച് വയസുകാരൻ ഉൾപ്പെടെയുള്ളവരെ നായ കടിച്ചു. നായയെ പേടിച്ച് ജനങ്ങൾ പുറത്തിറങ്ങാൻ പോലും ഭയന്നു. ഒടുവിൽ പട്ടിപിടുത്തക്കാർ എത്തിയാണ് നായയെ പിടികൂടി കൂട്ടിലാക്കിയത്. ആക്രമണത്തിൽ പരിക്കേറ്റവർ ജില്ലാ ആശുപത്രിയിൽ ചികിത്സയിലാണ്.
