ന്യൂഡൽഹി: മഹാകാളിയെ അപമാനിച്ച സംഭവത്തിൽ തൃണമൂൽ എംപി മഹുവ മൊയ്ത്രയ്ക്കും, നിർമ്മാതാവ് ലീന മണിമേഖലയ്ക്കുമെതിരെ ഡൽഹിയിലും പരാതി. ബിജെപി പ്രവർത്തകരാണ് പരാതിയുമായി ഡൽഹി പോലീസിനെ സമീപിച്ചത്. അതേസമയം മഹാകാളിയെ അപമാനിച്ച ഇരുവർക്കുമെതിരെ ശക്തമായ പ്രതിഷേധം തുടരുകയാണ്.
മഹുവയും, ലീന മണിമേഖലയും മതവികാരം വ്രണപ്പെടുത്തിയെന്ന് ചൂണ്ടിക്കാട്ടിയാണ് ബിജെപി പരാതി നൽകിയിരിക്കുന്നത്. ബിജെപി ഉപാദ്ധ്യക്ഷൻ രാജ് തിവാരിയുടെ നേതൃത്വത്തിലുള്ള സംഘമായിരുന്നു പരാതിയുമായി പോലീസിനെ സമീപിച്ചത്. മഹുവ കാളിയ്‌ക്കെതിരെ നടത്തിയ പരാമർശവും, മഹാകാളിയെ ലീന മണിമേഖല മോശമായി ചിത്രീകരിച്ചതും അപലപനീയമാണെന്ന് പരാതിയിൽ പറയുന്നു.
മഹാകാളിയ്‌ക്കെതിരെ മോശം പരാമർശം നടത്തി ഹിന്ദുക്കളുടെ വികാരം മഹുവ വ്രണപ്പെടുത്തി. ആർക്കും കാളിയെവെച്ച് ഇത്തരത്തിൽ മോശം പോസ്റ്റർ തയ്യാറാക്കാനുള്ള അവകാശമില്ല. ഹിന്ദുക്കളുടെ മതവികാരം വ്രണപ്പെടുത്തിയ ഇരുവർക്കുമെതിരെ കേസ് എടുക്കണമെന്നും പരാതിയിൽ ആവശ്യപ്പെടുന്നുണ്ട്. മഹുവ മൊയ്ത്രയെ പാർട്ടിയിൽ നിന്നും പുറത്താക്കാനുള്ള മാന്യത തൃണമൂൽ കോൺഗ്രസും മുഖ്യമന്ത്രി മമതാ ബാനർജിയും കാണിക്കണമെന്നും ബിജെപി പ്രതികരിച്ചു.
മഹാകാളിയ്‌ക്കെതിരെ മോശം പരാമർശം നടത്തിയതിൽ രാജ്യമെമ്പാടും നിരവധി പരാതികളാണ് ഇവർക്കെതിരെ പോലീസിന് ലഭിക്കുന്നത്. സംഭവത്തിൽ നിരവധി കേസുകളും രജിസ്റ്റർ ചെയ്തിട്ടുണ്ട്.
