ന്യൂഡൽഹി : നിർമ്മാണം പുരോഗമിക്കുന്ന ഡൽഹി-മുംബൈ എക്‌സ്പ്രസ് വേ ഉത്തർപ്രദേശിലെ ജെവാർ ഇന്റർനാഷണൽ എയർപോർട്ടുമായി ബന്ധിപ്പിക്കുമെന്ന് കേന്ദ്ര ഗതാഗതമന്ത്രി നിതിൻ ഗഡ്ഗരി. പദ്ധതിയ്‌ക്കായി 2,414 കോടി രൂപ അനുവദിച്ചു. രണ്ട് വർഷത്തെ സമയപരിധിയാണ് പദ്ധതിയ്‌ക്ക് അനുവദിച്ചിരിക്കുന്നത്. 31.425 കിലോമീറ്റർ നീളമുള്ള റോഡാകും പദ്ധതി പ്രകാരം നിർമിക്കുന്നത്. ആഗ്ര, മഥുര,പശ്ചിമ ഉത്തർപ്രദേശ് തുടങ്ങിയ ഭാഗങ്ങളെയും റോഡ് ബന്ധിപ്പിക്കും. പുതിയ പാത ഡൽഹിയിൽ നിന്ന് പുതിയ ജെവാർ വിമാനത്താവളത്തിലെത്താൻ എളുപ്പ മാർഗമാകും .
2.5 കിലോമീറ്റർ നീളത്തിൽ രണ്ട് മേൽപ്പാലങ്ങൾ ഖുഷിനഗറിൽ സ്ഥാപിക്കും. ഇതിനായി 42.67 കോടി രൂപ അനുവദിച്ചതായും ഗഡ്ഗരി ട്വിറ്ററിൽ വ്യക്തമാക്കി. ഇതിന്റെ പണി 18 മാസം കൊണ്ട് പൂർത്തിയാക്കുമെന്നും അറിയിച്ചു. മേൽപ്പാലത്തിന്റെ നിർമാണം പൂർത്തിയാകുന്നതോടെ ഗതാഗത കുരുക്കിന് ശമനമാകുമെന്നും വ്യക്തമാക്കി.
പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ അടിസ്ഥാന സൗകര്യ വികസനത്തിൽ വൻ കുതിപ്പുകളാണ് രാജ്യത്ത് നടക്കുന്നതെന്നും അദ്ദേഹം വ്യക്തമാക്കി. പുതിയ ഇന്ത്യയ്‌ക്ക് ലോകോത്തര നിലവാരമുള്ള സൗകര്യങ്ങളാണ് ആവശ്യമെന്നും അദ്ദേഹം കൂട്ടിച്ചേർത്തു.
