‘ചന്ദ്രമുഖി 2’ൽ നായികയാകാനൊരുങ്ങി ലക്ഷ്മി മേനോൻ. ലോറൻസ് ആണ് ചിത്രത്തിൽ നായകനായി എത്തുന്നത്. ജൂലൈ 15നാണ് ചിത്രത്തിന്റെ ഷൂട്ടിംഗ് ആരംഭിക്കുന്നത്. രജനീകാന്തും ചിത്രത്തിൽ ഉണ്ടാകുമെന്ന വാർത്തകൾ പുറത്ത് വന്നെങ്കിലും പിന്നീട് ഇത് തള്ളി. ഫാസിലിന്റെ സംവിധാനത്തിൽ 1993ൽ പുറത്തിറങ്ങിയ മണിച്ചിത്രത്താഴിന്റെ കന്നഡ റീമേക്ക് ആപ്തമിത്രയുടെ ഒഫിഷ്യൽ റീമേക്ക് ആയി പുറത്ത് വന്ന ചിത്രമായിരുന്നു രജനീകാന്ത് നായകനായി 2005ൽ പുറത്തെത്തിയ ചന്ദ്രമുഖി. ആപ്തമിത്ര ഒരുക്കിയ പി.വാസു തന്നെയായിരിക്കും ഈ ചിത്രത്തിന്റേയും സംവിധായകൻ.
തൃഷ നായികയായി എത്തുമെന്നായിരുന്നു ആദ്യ വാർത്തകൾ. ചന്ദ്രമുഖിയുടെ ആദ്യഭാഗത്തിൽ ഉണ്ടായിരുന്ന വടിവേലും രണ്ടാംഭാഗത്തിലും അഭിനയിക്കുന്നുണ്ട്. ലൈക്ക പ്രൊഡക്ഷൻസാണ് ചിത്രം നിർമ്മിക്കുന്നത്. അതേസമയം മണിച്ചിത്രത്താഴിന്റെ ഹിന്ദി റീമേക്ക് ഭൂൽ ഭുലയ്യയുടെ രണ്ടാം ഭാഗം അടുത്തിടെ പുറത്തിറങ്ങിയിരുന്നു. ഭൂൽ ഭുലയ്യ 2 എന്ന് പേരിട്ടിരിക്കുന്ന ഈ ചിത്രം വലിയ വിജയമാണ് നേടിയത്.
