ബെയ്ജിംഗ് : വർഷങ്ങളായി മൂത്രത്തിൽ രക്തം കണ്ടെത്തുന്നതിനെ തുടർന്ന് നടത്തിയ പരിശോധനയിൽ യുവാവിന്റെ ശരീരത്തിൽ ഗർഭപാത്രവും അണ്ഡാശയവും കണ്ടെത്തി. 20 വർഷമായി ആർത്തവം ഉണ്ടാകുന്ന ഇയാൾക്ക് സ്ത്രീയുടെയും പുരുഷന്റെയും ജനനേന്ദ്രീയങ്ങൾ ഉളളതായാണ് ഡോക്ടർമാർ കണ്ടെത്തിയത്. ചൈനയിലെ സിചുവാൻ പ്രവിശ്യയിലാണ് സംഭവം. 33 കാരനായ യുവാവിന്റെ ശരീരത്തിലാണ് ഇത്തരത്തിലുള്ള മാറ്റങ്ങൾ കണ്ടെത്തിയത്.
വർഷങ്ങളായി ഇയാൾക്ക് ആമാശയസംബന്ധമായ രോഗങ്ങൾ ഉണ്ട്. ക്രമരഹിതമായി മൂത്രം പോകുന്നതിനെ തുടർന്ന് വർഷങ്ങൾക്ക് മുൻപ് ഇയാൾ ശസ്ത്രക്രിയയ്ക്ക് വിധേയനായിരുന്നു. ഇതിന് പിന്നാലെ യുവാവിന് നിരന്തരം മൂത്രത്തിലൂടെ രക്തം പോകുകയും അസ്വസ്ഥത അനുഭവപ്പെടുകയും ചെയ്തിരുന്നു. തുടർച്ചയായി നാലും അഞ്ചും മണിക്കൂർ വേദന നീണ്ടു നിന്നു. ഇതോടെ അപ്പന്റിസൈറ്റിസ് ആണെന്ന് കരുതി ചികിത്സ തേടി. മരുന്ന് കഴിച്ചിട്ടും ഭേദമാകാതെ വന്നതോടെയാണ് പരിശോധനയ്ക്ക് വിധേയനായത്. പരിശോധനയിൽ യുവാവിന്റെ ശരീരത്തിൽ സ്ത്രീകളുടെ ക്രോമോസോമാണ് കണ്ടെത്തിയത്.
യുവാവിന് അണ്ഡാശയവും ഗർഭപാത്രവും ഉണ്ടെന്നും ഡോക്ടർമാർ കണ്ടെത്തി. ഇയാളിൽ പുരുഷന്മാരുടെ ഹോർമോണും കുറവാണ്. ഇതോടെ യുവാവ് ആൺ-പെൺ പ്രത്യുൽപാദന അവയവങ്ങളോടെയാണ് ജനിച്ചതെന്ന് തിരിച്ചറിഞ്ഞിട്ടുണ്ട്. ആർത്തവ സമയത്താണ് യുവാവിന്റെ മൂത്രത്തിൽ രക്തത്തിന്റെ അംശം കാണുന്നതെന്നും ഡോക്ടർമാർ അറിയിച്ചു. ഇയാൾക്ക് പുരുഷ ബീജം ഉത്പാദിപ്പിക്കാൻ കഴിയില്ലെന്നാണ് ഡോക്ടർമാർ പറയുന്നത്. അതുകൊണ്ട് തന്നെ പ്രത്യുൽപാദന ശേഷി ഉണ്ടാകില്ല.
സ്ത്രീകളുടെ പ്രത്യുൽപാദന അവയവങ്ങൾ തന്റെ ശരീരത്തിൽ ഉണ്ടെന്ന് കണ്ടെത്തിയതോടെ യുവാവ് അത് നീക്കം ചെയ്യാൻ ശസ്ത്രക്രിയ നടത്തി. ഇത്തരം സംഭവങ്ങൾ പലരിലും കണ്ടെത്താറുണ്ടെന്നും വിദഗ്ധർ പറയുന്നു.
Comments