പാലക്കാട് : തട്ടിക്കൊണ്ടുപോയ പോക്സോ കേസിലെ ഇരയെ ഇനിയും കണ്ടെത്താനായില്ല. കോടതിയിൽ വിചാരണ തുടങ്ങുന്നതിന് തൊട്ടുമുൻപാണ് പീഡനക്കേസിൽ പ്രതിയായ ചെറിയച്ഛനും കുടുംബക്കാരും ചേർന്ന് കുട്ടിയെ തട്ടിക്കൊണ്ട് പോയത്. തുടർന്ന് പോലീസ് അന്വേഷണം നടത്തിയെങ്കിലും കുട്ടിയെ കണ്ടെത്താനായില്ല. രക്ഷിതാക്കളുടെ ഫോൺ സ്വിച്ച് ഓഫാണ്.
ചെറിയച്ഛന്റെ പീഡനത്തിന് ഇരയായ പതിനൊന്നുകാരി മാതാപിതാക്കളോടൊപ്പം പോകേണ്ടെന്ന് കോടതിയിൽ പറഞ്ഞിരുന്നു. ചെറിയച്ഛനെ പിന്തുണയ്ക്കുന്നവരാണ് മാതാപിതാക്കൾ എന്നാണ് കുട്ടി പറഞ്ഞത്. തുടർന്ന് കുട്ടിയെ കോടതി മുത്തശ്ശിക്കൊപ്പം വിട്ടയയ്ക്കുകയായിരുന്നു.
ഈ മാസം 16 ന് കേസിന്റെ വിചാരണ ആരംഭിക്കാനിരിക്കെ മുത്തശ്ശിയുടെ വീട്ടിലെത്തിയ പ്രതിയും സംഘവും പെൺകുട്ടിയെ ബലപ്രയോഗത്തിലൂടെ പിടിച്ചുകൊണ്ട് പോകുകയായിരുന്നു. ബൈക്കിലും കാറുകളിലുമായാണ് ഇവർ എത്തിയത്. കാറിന്റെ നമ്പർ പ്ലേറ്റ് തുണികൊണ്ട് മറച്ചിരുന്നു. ബൈക്കിന്റെ നമ്പർ പ്ലേറ്റും വ്യാജമായിരുന്നു. സംഭവത്തിൽ കുട്ടിയുടെ മുത്തശ്ശി പരാതി നൽകിയതോടെ പോലീസ് കേസെടുത്ത് അന്വേഷണം ആരംഭിച്ചു.
