ന്യൂഡൽഹി : ജമ്മു കശ്മീരിലെ ശ്രീനഗറിൽ ഭീകരാക്രമണം നടത്തിയതിന്റെ ഉത്തരവാദിത്വം ഏറ്റെടുത്ത് ഐഎസ് ഹിന്ദ് പ്രവിശ്യ( വിലായത്ത് അൽ ഹിന്ദ്). ഭീകരർ നടത്തിയ ആക്രമണത്തിൽ ഒരു പോലീസ് ഉദ്യോഗസ്ഥൻ മരിക്കുകയും രണ്ട് പേർക്ക് പരിക്കേൽക്കുകയും ചെയ്തിരുന്നു. ഇന്നലെ വൈകീട്ട് 7.15 ഓടെയായിരുന്നു സംഭവം. ആക്രമണം നടത്തുന്നതിന്റെ വീഡിയോയും ഐഎസ് പങ്കുവെച്ചിട്ടുണ്ട്.
പിസ്റ്റളുമായെത്തി പോലീസ് ഉദ്യോഗസ്ഥനെ വെടിവെച്ച് കൊലപ്പെടുത്തുന്ന വീഡിയോയാണിത്. പിടിച്ചെടുത്ത ആയുധങ്ങളുടെ ചിത്രങ്ങളും ഇവർ പങ്കുവെച്ചിട്ടുണ്ട്. ഇസ്ലാമിക് സെൻട്രൽ മാദ്ധ്യമമായ അമാഖ് ആണ് വീഡിയോ പുറത്തുവിട്ടത്.
ലാൽ ബസാറിൽ വെച്ച് നടന്ന ആക്രമണത്തിൽ അസിസ്റ്റന്റ് സബ് ഇൻസ്പെക്ടർ മുഷ്താഖ് അഹമ്മദാണ് മരിച്ചത്. ഹെഡ് കോൺസ്റ്റബിൾ ഫയാസ് അഹമ്മദ്, എസ്പിഒ അബൂബക്കർ എന്നിവർക്ക് ആക്രമണത്തിൽ പരിക്കേറ്റു. ഈദ് ആഘോഷങ്ങൾക്ക് ശേഷം ഡ്യൂട്ടിയിൽ കയറിയതിന് മണിക്കൂറുകൾക്കകമാണ് മുഷ്താഖ് കൊല്ലപ്പെട്ടത്.
Comments