കാസർകോട്: മഞ്ചേശ്വരത്ത് സദാചാര ആക്രമണം നടത്തിയ സംഭവത്തിൽ രണ്ട് പേർ അറസ്റ്റിൽ. മഞ്ചേശ്വരം സ്വദേശികളായ വിജിത്ത് (28), മുസ്തഫ (43) എന്നിവരെയാണ് പോലീസ് അറസ്റ്റ് ചെയ്തത്.
കണ്ണൂർ യൂണിവേഴ്റ്റിയുടെ മഞ്ചേശ്വരം ക്യാമ്പസിലെ ജീവനക്കാർക്കെതിരെ രണ്ട് പേർ സദാചാര ഗുണ്ടായിസം നടത്തിയെന്നാണ് പരാതി. റോഡിൽ തടഞ്ഞുവച്ച് മർദിച്ചുവെന്നും വീഡിയോ പകർത്തിയെന്നും ജീവനക്കാർ പരാതി നൽകിയിരുന്നു. ചൊവ്വാഴ്ച വൈകിട്ടായിരുന്നു കേസിനാസ്പദമായ സംഭവം.
മൂന്ന് പേരാണ് ആക്രമണം നടത്തിയത്. ഇതിൽ രണ്ട് പേരാണ് അറസ്റ്റിലായതെന്നും മൂന്നാമനായി തിരച്ചിൽ നടത്തുകയാണെന്നും മഞ്ചേശ്വരം പോലീസ് അറിയിച്ചു. കോളേജിലെ വനിത ജീവനക്കാരിയും പുരുഷജീവനക്കാരനും റോഡിലൂടെ നടന്ന് പോകുമ്പോൾ മൂന്നംഗ സംഘമെത്തി ഭീഷണിപ്പെടുത്തുകയായിരുന്നു. ഇരുവരുടെയും ദൃശ്യങ്ങൾ മൊബൈലിൽ പകർത്തുകയും ചെയ്തു. ഇത് ചോദ്യം ചെയ്ത വനിത ജീവനക്കാരിയുടെ കയ്യിൽ കയറി പിടിച്ചുവെന്നും ഇവർ നൽകിയ പരാതിയിൽ പറയുന്നു.
