കൊച്ചി : കോൺഗ്രസ് അഭിഭാഷക സംഘടനാ പ്രസിഡന്റ് അഡ്വ ടി അസഫ് അലി രാജിവെച്ചു. കെപിസിസി പ്രസിഡന്റ് കെ സുധാകരനുമായുള്ള അഭിപ്രായവ്യത്യാസത്തെ തുടർന്നാണ് രാജി. സംസ്ഥാനത്തെ കോൺഗ്രസ് അനുഭാവികളായ അഭിഭാഷകരുടെ സംഘടനയായ ഇന്ത്യൻ ലോയേഴ്സ് കോൺഗ്രസ്.
കോൺഗ്രസുകാർ പ്രതിയാകുകയും ഇരയാകുകയും ചെയ്യുന്ന കേസുകളിൽ നിയമസഹായം നൽകുന്നതാണ് സംഘടനയുടെ ലക്ഷ്യം. എന്നാൽ അഡ്വക്കേറ്റ് വി.എസ് ചന്ദ്രശേഖരൻ കഴിഞ്ഞ മെയിൽ പുതിയൊരു സംഘടന രൂപീകരിച്ചു. കോൺഗ്രസ് നിയമസഹായസമിതി എന്ന പേരിൽ കെപിസിസിയുടെ അനുമതിയോടെയാണ് സംഘടന ആരംഭിച്ചത്. എന്നാൽ സംസ്ഥാനത്തെ ഇന്ത്യൻ ലോയേഴ്സ് കോൺഗ്രസ്, കോൺഗ്രസ് നിയമസഹായ സമിതി കമ്മിറ്റി പിരിച്ചുവിടണമെന്ന് ആവശ്യപ്പെട്ടു.
കൊച്ചിയിൽ യോഗം ചേർന്ന് പുതിയ സംഘടനയെ നിരോധിക്കണമെന്നും അല്ലെങ്കിൽ കമ്മിറ്റികൾ പിരിച്ചുവിടണമെന്നും ആവശ്യമുന്നയിക്കുകയും ചെയ്തിരുന്നു. ടി. അസഫലിയുടെ നേതൃത്വത്തിലെടുത്ത ഈ തീരുമാനത്തെ കെപിസിസി നേതൃത്വം ചോദ്യംചെയ്തു. ഇരുസംഘടനകളും പ്രവർത്തിക്കണമെന്നാണ് കെപിസിസി ആവശ്യപ്പെട്ടത്. ഇതിന് പിന്നാലെയാണ് രാജി സമർപ്പിച്ചത്.
