കൈവിട്ട് പോകുന്ന ഉപയോക്താക്കളെ പിടിച്ചു നിർത്താനും കൂടുതൽ ജനപ്രീതി ആർജ്ജിക്കാനും പുത്തൻ തന്ത്രങ്ങളുമായി ഫേസ്ബുക്ക്. പരിഷ്കരണ നടപടികളുടെ ഭാഗമായി വലിയ മാറ്റങ്ങൾക്കാണ് ഫേസ്ബുക്ക് തയ്യാറെടുക്കുന്നത്. ഒരു അക്കൗണ്ടിൽ ഒന്നിലധികം പ്രൊഫൈലുകൾ ഉപയോഗിക്കാൻ ഉപയോക്താക്കളെ അനുവദിക്കാനുള്ള തീരുമാനം ഇവയിൽ സുപ്രധാനമാണ്. മറ്റ് സാമൂഹിക മാദ്ധ്യമ പ്ലാറ്റ്ഫോമുകളിൽ നിന്നും നേരിടുന്ന കടുത്ത മത്സരമാണ് പ്രധാനമായും ഫേസ്ബുക്കിനെ പരിഷ്കരണ നടപടികൾക്ക് പ്രേരിപ്പിക്കുന്നത്.
യഥാർത്ഥ പേരിലുള്ള പ്രധാന അക്കൗണ്ടിൽ, ഉപയോക്താക്കളുടെ അഭിരുചി അനുസരിച്ച് വിവിധ പ്രൊഫൈലുകൾ രൂപീകരിക്കാനുള്ള സംവിധാനം തയ്യാറാക്കാനാണ് ഫേസ്ബുക്ക് ഒരുങ്ങുന്നത്. പ്രൊഫഷണൽ കോണ്ടാക്ടുകളിൽ നിന്നും കുടുംബാംഗങ്ങളെയും സുഹൃത്തുക്കളെയും ഫിൽട്ടർ ചെയ്യാൻ ഇത് വഴി സാധിക്കും. ഒരു വ്യക്തിയുടെ ഓരോ തനത് ഇടങ്ങളും പുറത്ത് നിന്നുള്ള ഇടപെടൽ ഇല്ലാതെ സ്വതന്ത്രമായി നിലനിർത്താൻ ഇത് വഴി സാധിക്കും.
ഉപയോക്താക്കൾ പതിവായി തങ്ങളുടെ പ്രൊഫൈലുകളിൽ നിന്ന് പോസ്റ്റ് ചെയ്യുകയും അത് വഴി നഷ്ടമായിക്കൊണ്ടിരിക്കുന്ന പ്രതാപം നിലനിർത്തുകയും ചെയ്യാം എന്ന്, പരിഷ്കരണ നടപടികളിലൂടെ ഫേസ്ബുക്ക് കണക്ക് കൂട്ടുന്നു. അധികമായി രൂപീകരിക്കുന്ന പ്രൊഫൈലുകളിൽ ഉപയോക്താക്കൾ യഥാർത്ഥ പേര് ഉപയോഗിക്കണം എന്ന് നിർബന്ധമില്ല. സംഖ്യകളോ പ്രത്യേക ചിഹ്നങ്ങളോ അല്ലാത്ത ഏത് പ്രൊഫൈൽ നെയിമും യൂസർ നെയിമും ഉപയോഗിക്കാം.
എന്നാൽ, പ്രധാന അക്കൗണ്ടിൽ യഥാർത്ഥ പേര് വേണം എന്നത് നിർബന്ധമാണ്. അതേസമയം, പുതിയ സംവിധാനത്തിലൂടെ മറ്റൊരാളുടെ വ്യാജ അക്കൗണ്ട് നിർമ്മിക്കാൻ സാധിക്കില്ല. അത് കണ്ടെത്താൻ ഫേസ്ബുക്കിന്റെ നിർമ്മിത ബുദ്ധി സംവിധാനം അപ്ഡേറ്റ് ചെയ്യപ്പെടും. അധികമായി രൂപീകരിക്കുന്ന പ്രൊഫൈലുകളിൽ നിന്ന് ഏതെങ്കിലും തരത്തിലുള്ള പോളിസി ലംഘനം ഉണ്ടായാൽ അത് അക്കൗണ്ടിനെ മുഴുവനായി ബാധിക്കും. ഒന്നിലധികം തവണ ഇത്തരത്തിൽ സംഭവിച്ചാൽ അക്കൗണ്ട് പൂർണ്ണമായി നഷ്ടമാകുകയും ചെയ്യും.
പ്രൊഫൈലുകൾക്കിടയിൽ നിരന്തര സഞ്ചാരം നടത്തി സമയനഷ്ടമുണ്ടാക്കാൻ ഉപയോക്താക്കൾ പ്രേരിതരാകും എന്നതാണ് ഫേസ്ബുക്കിന്റെ പുതിയ സംവിധാനത്തിന്റെ പ്രധാന ന്യൂനതയായി ചൂണ്ടിക്കാണിക്കപ്പെടുന്നത്. ഇത് സാമൂഹിക മാദ്ധ്യമ അടിമത്തത്തിലേക്കും ലഘുമനോരോഗങ്ങളിലേക്കും നയിച്ചേക്കാമെന്നും വിമർശനങ്ങൾ ഉയരുന്നു. ഏതായാലും, ഫേസ്ബുക്കിന്റെ പുതിയ പരിഷ്കാരങ്ങൾ, മെറ്റാവേഴ്സ് ഉൾപ്പെടെ ഉടൻ നടപ്പിലാകും എന്നാണ് വിവരം.
