ലാഹോർ: മോശം ഫോമിന്റെ പേരിൽ വിമർശനം നേരിടുന്ന ഇന്ത്യൻ ക്രിക്കറ്റ് താരം വിരാട് കോഹ്ലിക്ക് പിന്തുണയുമായി മുൻ പാകിസ്ഥാൻ താരം ഷോയിബ് അക്തർ. 43 ഏകദിന സെഞ്ച്വറികളും 27 ടെസ്റ്റ് സെഞ്ച്വറികളും നേടുക എന്നത് അന്താരാഷ്‌ട്ര ക്രിക്കറ്റിൽ നിസ്സാരമായ കാര്യമല്ല. അവ അദ്ദേഹം കഠിനാദ്ധ്വാനം ചെയ്ത് നേടിയതാണ്. അല്ലാതെ പറമ്പിൽ കളിച്ചോ കാൻഡി ക്രഷ് കളിച്ചോ നേടിയതല്ല. അക്തർ പറഞ്ഞു.
ഏകദേശം കഴിഞ്ഞ രണ്ടര വർഷക്കാലമായി സ്ഥിരതയില്ലായ്മ വിരാട് കോഹ്ലിയെ അലട്ടുന്നുണ്ട്. ഈ സാഹചര്യത്തിൽ വിരാട് കോഹ്ലിക്കെതിരെ വലിയ വിമർശനങ്ങൾ ഉയർന്നിരുന്നു. കോഹ്ലി ട്വന്റി 20 ലോകകപ്പ് ടീമിൽ നിന്ന് പുറത്താകാൻ സാദ്ധ്യതയുണ്ടെന്ന വാർത്തകളും പുറത്ത് വരുന്നുണ്ട്.
ഇന്ത്യൻ ടീമിൽ നിന്നും വിരാട് കോഹ്ലി പുറത്താകുക എന്നത് ചിന്തിക്കാനാകാത്ത കാര്യമാണ്. കഴിഞ്ഞ പത്ത് വർഷക്കാലത്തിനിടെ ലോക ക്രിക്കറ്റിന് ഇന്ത്യ നൽകിയ ഏറ്റവും മികച്ച സംഭാവനയാണ് കോഹ്ലിയെന്നും അക്തർ പറഞ്ഞു.
