കോട്ടയം: പൃഥിരാജ്-ഷാജികൈലാസ് കൂട്ടുകെട്ടിലെത്തിയ കടുവയ്ക്ക് ടിക്കറ്റ് കിട്ടിയില്ലെന്നാരോപിച്ച് രണ്ടുപേർ ആത്മഹത്യയ്ക്ക് ശ്രമിച്ചു. ഏറ്റുമാനൂർ സ്വദേശികളായ യുവതിയും യുവാവുമാണ് തിയേറ്ററിന് മുൻപിൽ കൈ ഞരമ്പ് മുറിച്ച് ജീവനൊടുക്കാൻ ശ്രമിച്ചത്. ഫസ്റ്റ് ഷോയ്ക്കായി തിയേറ്ററിലെത്തിയതായിരുന്നു ഇരുവരും.
മദ്യ ലഹരിയിലായിരുന്ന ഇരുവരും സെക്യൂരിറ്റി ജീവനക്കാരനോട് ടിക്കറ്റ് ആവശ്യപ്പെട്ടു. എന്നാൽ ടിക്കറ്റ് ഇല്ലെന്നും ചിത്രം ഹൗസ് ഫുൾ ആണ് എന്നും ജീവനക്കാരൻ പറഞ്ഞു. ഇതോടെ ക്ഷുഭിതരായ യുവതിയും യുവാവും ജീവനക്കാരോട് തട്ടിക്കയറി.
പിന്നാലെ രണ്ടുപേരും തിയേറ്ററിന് മുമ്പിലിരിക്കുകയും ബ്ലേഡ് ഉപയോഗിച്ച് കൈ ഞരമ്പ് മുറിയ്ക്കുകയുമായിരുന്നു. ഉടൻ തന്നെ തിയേറ്റർ അധികൃതർ പോലീസിനെ വിവരമറിയിക്കുകയായിരുന്നു. സ്ഥലത്തെത്തിയ പോലീസ് ,ഇരുവരുടെയും പരിക്ക് ഗുരുതരമല്ലെന്ന് കണ്ടതോടെ വീണ്ടും തിയേറ്ററിൽ എത്തിയാൽ ടിക്കറ്റ് എടുത്തു നൽകാമെന്ന് ഉറപ്പ് നൽകിയശേഷം വിട്ടയക്കുകയായിരുന്നു.
