തിരുവനന്തപുരം : കെ കെ രമ എംഎൽഎയ്ക്കെതിരെ നടത്തിയ പരാമർശം പിൻവലിച്ച് മുൻ മന്ത്രി എംഎം മണി. താൻ അത്തരമൊരു ഉദ്ദശത്തോടെ നടത്തിയ പ്രസ്താവനയല്ല, എന്നാൽ അത് ദുർവ്യാഖ്യാനിക്കപ്പെടുകയായിരുന്നു. ഒരു കമ്യൂണിസ്റ്റുകാരനായ താൻ വിധി എന്ന വാക്ക് ഉപയോഗിക്കാൻ പാടില്ലായിരുന്നു. അതുകൊണ്ട് കെ കെ രമയ്ക്കെതിരെ നടത്തി പരാമർശം പൻവലിക്കുന്ന എന്നാണ് എംഎം മണി നിയമസഭയിൽ അറിയിച്ചത്. സ്പീക്കറുടെ നിർദ്ദേശത്തെ തുടർന്നാണ് പരാമർശം പിൻവലിച്ചത്.
വിവാദ പരാമർശം നടത്തി ദിവസങ്ങൾക്ക് ശേഷം സ്പീക്കർ എംബി രാജേഷ് മണിയുടെ പരാമർശത്തിൽ നിലപാട് വ്യക്തമാക്കി. മണിയുടെ പരാമർശത്തിൽ തെറ്റായ ആശയം ഉണ്ടെന്നാണ് സ്പീക്കർ പറഞ്ഞത്. എംഎൽഎക്കെതിരെ നടത്തിയ പരാമർശത്തിൽ തെറ്റായ രാഷ്ട്രീയം ഉണ്ടായിട്ടുണ്ട്. സഭയിൽ ഉപയോഗിക്കാൻ പാടില്ലാത്ത വാക്കുകൾ ഉപയോഗിച്ചില്ല, എങ്കിലും ചില വാക്കുകൾ അൺപാർലമെന്ററി ആയി. അപരിഷ്കൃത പരാമർശങ്ങളും വാക്കുകളും ഒഴിവാക്കപ്പെടേണ്ടതാണെന്ന് സമൂഹത്തിൽ അഭിപ്രായം ഉണ്ട്. എന്നാൽ ജന പ്രതിനിധികളിൽ ഈ മാറ്റം വന്നിട്ടില്ലെന്ന് സ്പീക്കർ പറഞ്ഞു.
സഭയ്ക്ക് കാലത്തിന്റെ മാറ്റം ഉൾകൊള്ളാൻ കഴിയണം. സ്വയം തിരുത്തൽ അംഗങ്ങളുടെ ഭാഗത്തു നിന്നും ഉണ്ടാകണം. എംഎം മണിയുടെ പരാമർശത്തിൽ തെറ്റായ രാഷ്ട്രീയം ഉണ്ടായിട്ടുണ്ടെന്നും ഈ പരാമർശം അദ്ദേഹം സ്വയം പിൻവലിക്കും എന്ന് പ്രതീക്ഷിക്കുന്നുവെന്നും സ്പീക്കർ പറഞ്ഞു. ഇതിന് പിന്നാലെയാണ് എംഎം മണി പരാമർശം പിൻവലിച്ചത്.
