ലോകമെമ്പാടുമുള്ള സുരേഷ് ഗോപി ആരാധകർ ഏറെ പ്രതീക്ഷയോടെ കാത്തിരിക്കുന്ന സിനിമയാണ് ‘പാപ്പൻ’. ഒരിടവേളയ്ക്ക് ശേഷം സംവിധായകൻ ജോഷിയും സുരേഷ് ഗോപിയും ഒന്നിക്കുന്നവെന്ന പ്രത്യേകതയും ചിത്രത്തിനുണ്ട്. സിനിമയുമായി ബന്ധപ്പെട്ട് പുറത്ത് വരുന്ന വാർത്തകൾക്ക് പ്രേക്ഷകരിൽ നിന്നും വൻ സ്വീകാര്യതയാണ് ലഭിക്കുന്നത്.
നാളെ (ജൂലൈ 22) പാപ്പന്റെ ട്രെയിലർ ലോഞ്ച് നടക്കുമെന്ന വിവരമാണ് നടൻ സുരേഷ് ഗോപി തന്റെ ഫേസ്ബുക്ക് പോസ്റ്റിലൂടെ അറിയിച്ചിരിക്കുന്നത്. കൊച്ചി ലുലു മാളിൽ വൈകിട്ട് ആറ് മണിക്കാണ് ട്രെയിലർ ലോഞ്ച് നടക്കുക. മാസ്സ് ഫാമിലി ക്രൈം ഇൻവസ്റ്റിഗേഷൻ ത്രില്ലറായി ഒരുക്കുന്ന ചിത്രത്തിന്റെ ട്രെയിലറിനെക്കുറിച്ച് ആരാധകർക്ക് വലിയ പ്രതീക്ഷയാണുള്ളത്.
സുരേഷ് ഗോപിയും മകൻ ഗോകുലും ആദ്യമായി ഒന്നിക്കുന്നുവെന്ന പ്രത്യേകതയും സിനിമയ്ക്കുണ്ട്. ജനുവരിയിൽ ചിത്രീകരണം പൂർത്തിയായ സിനിമയുടെ റിലീസ് ജൂലൈ 29-നാണ് നടക്കുക. ചിത്രത്തിൽ സുരേഷ് ഗോപിക്ക് പുറമെ കനിഹ, നൈല ഉഷ, നീത പിള്ള എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. ശ്രീ ഗോകുലം മൂവീസിന് വേണ്ടി ഗോകുലം ഗോപാലൻ അവതരിപ്പിക്കുന്ന ‘പാപ്പൻ’ ഒരുങ്ങുന്നത് ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും ബാനറിലാണ്.
