ന്യൂഡൽഹി: ഇന്ത്യയുടെ രാഷ്ട്രപതി സ്ഥാനം ഉറപ്പിച്ച് എൻഡിഎ സ്ഥാനാർത്ഥി ദ്രൗപദി മുർമു. ആകെ വോട്ട് മൂല്യം കേവല ഭൂരിപക്ഷം പിന്നിട്ടു. മൂന്നാം റൗണ്ട് വോട്ടെണ്ണൽ പൂർത്തിയായതോടെയാണ് മുർമു കേവല ഭൂരിപക്ഷം മറികടന്നത്.
5,43,216 വോട്ട് മൂല്യമാണ് കേവല ഭൂരിപക്ഷത്തിനായി വേണ്ടത്. എന്നാൽ മൂന്നാം റൗണ്ട് വോട്ടെണ്ണൽ പൂർത്തിയായതോടെ മുർമുവിന്റെ വോട്ട് മൂല്യം 5,77,777 ആയി ഉയർന്നു. ഇതുവരെ 2161 വോട്ടുകളാണ് മുർമുവിന് ലഭിച്ചത്. മുർമുവിന് ലഭിച്ച വോട്ട് മൂല്യത്തിന്റെ നേർപകുതിയിൽ കുറവ് വോട്ടുകൾ മാത്രമാണ് എതിർ സ്ഥാനാർത്ഥി യശ്വന്ത് സിൻഹയ്ക്ക് ലഭിച്ചത്. 2,61,062 ആണ് യശ്വന്ത് സിൻഹയുടെ വോട്ട് മൂല്യം. മൂന്നാം റൗണ്ട് വോട്ടെണ്ണൽ പൂർത്തിയാക്കിയപ്പോൾ യശ്വന്ത് സിൻഹയ്ക്ക് 1058 വോട്ടുകളാണ് ലഭിച്ചിട്ടുള്ളത്.
കർണാടക, കേരളം, മദ്ധ്യപ്രദേശ്, മഹാരാഷ്ട്ര, മണിപ്പൂർ, മേഘാലയ, മിസോറം, നാഗാലാന്റ്, ഒഡീഷ, പഞ്ചാബ് എന്നീ സംസ്ഥാനങ്ങളുടെ വോട്ടുകളാണ് മൂന്നാം റൗണ്ടിൽ എണ്ണിയത്. സംസ്ഥാനങ്ങളിൽ നിന്നും ദ്രൗപദി മുർമുവിന് 812 വോട്ടുകളും, യശ്വന്ത് സിൻഹയ്ക്ക് 521 വോട്ടുകളും ലഭിച്ചതായി വരണാധികാരി പി.സി മോദി അറിയിച്ചു.
