ന്യൂഡൽഹി: രാഷ്ട്രപതി തിരഞ്ഞെടുപ്പിൽ ദ്രൗപദി മുർമ്മു ചരിത്രവിജയം നേടിയതിന് പിന്നാലെ പശ്ചിമബംഗാൾ മുഖ്യമന്ത്രി മമതാ ബാനർജിയെ പരിഹസിച്ച് ബിജെപി നേതാവ് അമിത് മാളവ്യ. തൃണമൂൽ കോൺഗ്രസിന്റെ രണ്ട് എംഎൽഎമാരും ഒരു എംഎൽഎയും ക്രോസ് വോട്ട് ചെയ്തതിനെ പരിഹസിച്ചായിരുന്നു അമിത് മാളവ്യയുടെ ട്വീറ്റ്. രണ്ട് തൃണമൂൽ കോൺഗ്രസ് എംപിമാരുടേയും നാല് എംഎൽഎമാരുടേയും വോട്ട് അസാധുവാകുകയും ചെയ്തു.
പ്രതിപക്ഷ ഐക്യത്തിന് വേണ്ടി സ്വയം അവരുടെ നേതൃസ്ഥാനം ഏറ്റെടുത്ത മമതയ്ക്ക് സ്വന്തം നിയമസഭാംഗങ്ങളെ പോലും നിയന്ത്രിക്കാനായില്ല. പാർട്ടിയിലെ അംഗങ്ങൾ പോലും മമതയുടെ നിർദ്ദേശങ്ങൾ അനുസരിക്കുന്നില്ല. എന്നാൽ പശ്ചിമബംഗാളിൽ ബിജെപിയുടെ നിയമസഭാംഗങ്ങളെല്ലാം ഭീഷണികൾക്കിടയിലും ദ്രൗപദി മുർമുവിനെ പിന്തുണച്ചുവെന്നും അമിത് മാളവ്യ പറഞ്ഞു.
അതേസമയം ഫലപ്രഖ്യാപനത്തിന് പിന്നാലെ ദ്രൗപദി മുർമുവിനെ അഭിനന്ദിച്ച് മമത രംഗത്തെത്തിയിരുന്നു. ‘ രാഷ്ട്രപതി സ്ഥാനത്തേക്ക് തിരഞ്ഞെടുക്കപ്പെട്ട ദ്രൗപദി മുർമുവിനെ അഭിനന്ദിക്കുന്നു. ഭരണഘടനയുടെ ആശയങ്ങൾ സംരക്ഷിക്കാനും ജനാധിപത്യത്തിന്റെ കാവലാളാകാനും കഴിയട്ടെ. രാജ്യം നിങ്ങളെ ഉറ്റുനോക്കുകയാണെന്നും’ മമതയുടെ കുറിപ്പിൽ പറയുന്നു.
