ന്യൂഡൽഹി: സ്വാതന്ത്ര്യത്തിന്റെ അമൃത മഹോത്സവത്തിന്റെ ഭാഗമായി എല്ലാ വീടുകളിലും ത്രിവർണ പതാക ഉയർത്താനുള്ള പ്രധാനമന്ത്രിയുടെ ആഹ്വാനത്തിനെതിരെ കോൺഗ്രസ്. പ്രധാനമന്ത്രിയുടെയും ബിജെപിയുടെയും നീക്കം രാജ്യസ്നേഹം അടിച്ചേൽപ്പിക്കാനാണ് എന്നാണ് കോൺഗ്രസിന്റെ വിമർശനം. കോൺഗ്രസ് നേതാക്കളായ റഷീദ് ആൽവിയും ജയ്റാം രമേശുമാണ് പരസ്യ വിമർശനവുമായി രംഗത്ത് വന്നിരിക്കുന്നത്.
എല്ലാ വീടുകളിലും ത്രിവർണ പതാക ഉയർത്താനുള്ള പ്രധാനമന്ത്രിയുടെ ആഹ്വാനത്തിനെതിരെ വിമർശനം ഉന്നയിച്ച കോൺഗ്രസിനെതിരെ രൂക്ഷമായ പ്രതികരണവുമായി ബിജെപി നേതാവ് ഗൗരവ് ഭാട്ടിയ രംഗത്ത് വന്നു. ജനങ്ങൾ എല്ലാ വീട്ടിലും ത്രിവർണ പതാക ഉയർത്താനുള്ള പ്രധാനമന്ത്രിയുടെ ആഹ്വാനം ഏറ്റെടുത്തിരിക്കുകയാണ്. കോൺഗ്രസിനാണ് ഇക്കാര്യത്തിൽ അസ്വസ്ഥതയെന്ന് അദ്ദേഹം പറഞ്ഞു.
ദേശീയ കാഴ്ചപ്പാടിൽ നിന്നു കൊണ്ട് ഒരു നല്ല കാര്യമാണ് പ്രധാനമന്ത്രി പറഞ്ഞത്. എന്നാൽ കോൺഗ്രസ് ഇതിനെ അടിച്ചേൽപ്പിക്കലായി കാണുന്നു. എല്ലാ വീട്ടിലും ദേശീയ പതാക ഉയർത്തുന്നതിനെ കുറിച്ചാണ് ബിജെപി സർക്കാർ സംസാരിക്കുന്നത്. എന്നാൽ കോൺഗ്രസ് സംസാരിക്കുന്നത് എല്ലാ വീട്ടിലും അഫ്സൽ ഗുരുമാരെ സൃഷ്ടിക്കാനാണ്. ഇതായിരുന്നു ഗൗരവ് ഭാട്ടിയയുടെ വാക്കുകൾ.
സ്വാതന്ത്ര്യത്തിന്റെ അമൃത മഹോത്സവത്തിന്റെ ഭാഗമായി ഓഗസ്റ്റ് 13നും 15നും ഇടയിലായി ത്രിവർണ്ണ പതാക വീടുകളിൽ ഉയർത്തണമെന്നാണ് പ്രധാനമന്ത്രി അഭ്യർത്ഥിച്ചിരിക്കുന്നത്.
Comments