പോർട്ട് ഓഫ് സ്‌പെയിൻ: വെസ്റ്റിൻഡീസിനെതിരെ ഇന്ത്യയുടെ ആദ്യ ഏകദിനം രാത്രി 7 മണിക്ക് ആരംഭിക്കും. ശിഖർ ധവാനാണ് ഇന്ത്യയെ നയിക്കുന്നത്. ഇംഗ്ലണ്ടിനെതിരെ ഏകദിന പരമ്പര നേടിയ ടീമിൽ രോഹിത് ശർമ്മ, വിരാട് കോഹ്ലി, ഋഷഭ് പന്ത്, ഹാർദ്ദിക് പാണ്ഡ്യ, മുഹമ്മദ് ഷമി. ജസ്പ്രീത് ബൂമ്ര എന്നിവർക്ക് വിശ്രമം അനുവദിച്ചിരിക്കുകയാണ്.
വെസ്റ്റിൻഡീസിനെ നയിക്കുന്നത് നിക്കോളാസ് പൂരനാണ്. ജാസൺ ഹോൾഡറുടെ ഓൾ റൗണ്ടർ സാന്നിദ്ധ്യവും കരീബിയൻ നിരയെ സ്വന്തം മണ്ണിൽ ശക്തരാക്കുന്ന ഘടകമാണ്.
നിലവിലെ ടീമിൽ ഓപ്പണർ റോളിൽ ഇഷാൻ കിഷനോ ഋതുരാജ് ഗെയ്ക് വാദോ കളിക്കും. മൂന്നാമനായി ശ്രേയസ് അയ്യരും നാലാമനായി മികച്ച ഫോമിലുള്ള ദീപക് ഹൂഡയും ഇറങ്ങാനാണ് സാദ്ധ്യത. ഇഷാൻ കളിച്ചില്ലെങ്കിൽ അഞ്ചാമനായി സഞ്ജു സാംസണാണ് ഇറങ്ങേണ്ടിവരിക. സൂര്യകുമാർ യാദവ്, അക്ഷർ പട്ടേൽ, ഷാർദ്ദൂൽ ഠാക്കുർ, ആവേശ് ഖാൻ, പ്രസിദ്ധ് കൃഷ്ണ, യുസ്വേന്ദ്ര ചാഹൽ, മുഹമ്മദ് സിറാജ് എന്നിവരാണ് പരിഗണിക്കപ്പെടേണ്ട ലിസ്റ്റിലുള്ള മറ്റ് പ്രധാന താരങ്ങൾ.
