എറണാകുളം: ദേശീയ ചലച്ചിത്ര പുരസ്‌കാരം പ്രഖ്യാപിച്ചതിന് പിന്നാലെ ജേതാക്കളെ അഭിനന്ദിച്ച് നടൻ പൃഥ്വിരാജ്. അയ്യപ്പനും കോശിയും എന്ന ചിത്രത്തിന് പുരസ്‌കാരം നേടിക്കൊടുത്ത സഹപ്രവർത്തകരെയാണ് പൃഥ്വിരാജ് അഭിനന്ദിച്ചത്. സംവിധായകൻ സച്ചിയെയും താരം സ്മരിച്ചു.
ഫേസ്ബുക്കിലൂടെയായിരുന്നു ജേതാക്കൾക്ക് അഭിനന്ദനങ്ങൾ അറിയിച്ച് പൃഥ്വിരാജ് രംഗത്ത് എത്തിയത്. മികച്ച സഹനടനായ ബിജു മേനോനും, ഗായികയ്‌ക്കുള്ള പുരസ്‌കാരം നേടിയ നഞ്ചിയമ്മയ്‌ക്കും അയ്യപ്പനും കോശിയും സിനിമയുടെ അണിയറപ്രവർത്തകർക്കും അഭിനന്ദങ്ങൾ. സച്ചി… എന്താണ് പറയേണ്ടതെന്ന് അറിയില്ല. നിങ്ങൾ എവിടെയാണ്. എവിടെയാണെങ്കിലും സന്തോഷമായി ഇരിക്കുന്നുവെന്നാണ് കരുതുന്നത്. കാരണം നിങ്ങളിൽ ഞാൻ അഭിമാനം കൊള്ളുന്നു.- പൃഥ്വിരാജ് ഫേസ്ബുക്കിൽ കുറിച്ചു.
ബിജു മേനോന് ഒപ്പം ടൈറ്റിൽ കഥാപാത്രമായിരുന്നു പൃഥ്വിരാജ്. മികച്ച നടനുള്ള പുരസ്‌കാരത്തിനായി പൃഥ്വിരാജിന്റെ പേരും പരിഗണിച്ചിരുന്നു. അതേസമയം മികച്ച സംവിധാനം ഉൾപ്പെടെ നാല് പുരസ്‌കാരങ്ങളാണ് അയ്യപ്പനും കോശിയും മലയാള സിനിമയ്‌ക്ക് നേടി തന്നത്. മികച്ച സഹനടൻ, സംവിധാനം, ഗായിക, സംഘട്ടനം എന്നിവയ്‌ക്കാണ് പുരസ്‌കാരങ്ങൾ.
