മുംബൈ: അഭിനേതാക്കളും ദമ്പതികളുമായ കത്രീന കൈഫിനും വിക്കി കൗശലിനും വധഭീഷണി. ഇരുവരുടേയും പരാതി പ്രകാരം മുംബൈ പോലീസ് കേസെടുത്തു. സമൂഹമാദ്ധ്യമത്തിലൂടെയാണ് അജ്ഞാതന്റെ വധഭീഷണിയുണ്ടായത്.
സാന്താക്രൂസ് പോലീസിലാണ് ദമ്പതികൾ പരാതി നൽകിയത്. എന്തായിരുന്നു ഭീഷണി സന്ദേശമെന്ന് ഇതുവരെ പുറത്തുവിട്ടിട്ടില്ല. ഇൻസ്റ്റഗ്രാമിൽ വിക്കി കൗശലിന് വധഭീഷണി സന്ദേശം അയച്ചതായും ഭാര്യയെയും കൊല്ലുമെന്ന് ഭീഷണിപ്പെടുത്തിയതായുമാണ് വിവരം. കഴിഞ്ഞ ഡിസംബറിലായിരുന്നു ഇരുവരും വിവാഹിതരായത്. ഏതാനും ദിവസങ്ങൾക്ക് മുമ്പ് ദമ്പതികൾ മാലിദ്വീപിൽ അവധിയാഘോഷിക്കാൻ പോയതിന് പിന്നാലെയാണ് വധഭീഷണി വാർത്തകൾ പുറത്തുവന്നത്.
കഴിഞ്ഞയിടയ്ക്ക് ബോളിവുഡ് സൂപ്പർസ്റ്റാർ സൽമാൻ ഖാനും ഇത്തരത്തിൽ വധഭീഷണി ലഭിച്ചിരുന്നു. സൽമാനും അദ്ദേഹത്തിന്റെ പിതാവ് സലിം ഖാനും സിദ്ധു മൂസെവാലെയെപോലെ തീരുമെന്നായിരുന്നു ഭീഷണി. സലിം ഖാൻ പതിവായി നടക്കാൻ പോകുന്ന സ്ഥലത്ത് ബെഞ്ചിൽ നിന്നായിരുന്നു ഭീഷണി സന്ദേശം ലഭിച്ചത്.
സംഭവത്തിന് പിന്നാലെ സൽമാൻ ഖാൻ പോലീസിൽ പരാതിപ്പെട്ടിരുന്നു. വധഭീഷണിയുടെ പശ്ചാത്തലത്തിൽ തനിക്ക് ആയുധ ലൈസൻസ് വേണമെന്നും സൽമാൻ ആവശ്യപ്പെട്ടു. ഇതിനായി അദ്ദേഹം പോലീസിൽ അപേക്ഷ സമർപ്പിച്ചിട്ടുണ്ട്.
Comments