തമിഴ്സിനിമാ മേഖലയിൽ ഏറ്റവും വലിയ തുക പ്രതിഫലമായി വാങ്ങുന്ന താരമാണ് രജനീകാന്ത്. വർഷത്തിൽ ഒരുപാട് ചിത്രങ്ങളിൽ അഭിനയിക്കുന്നില്ല എങ്കിലും ചെയ്യുന്ന ചിത്രങ്ങളെല്ലാം ബിഗ് ബജറ്റ് ചിത്രങ്ങളാണ്. ഇപ്പോൾ താരത്തെ തേടി ആദായനികുതി വകുപ്പിന്റെ അനുമോദനം എത്തിയിരിക്കുകയാണ്. തമിഴ് വിനോദ വ്യവസായത്തിൽ നിന്ന് ഏറ്റവും കൂടുതൽ നികുതി അടച്ചതിനാണ് നികുതി വകുപ്പ് നടനെ ആദരിച്ചത്.
ചെന്നൈയിൽ ആദായ നികുതി വകുപ്പ് സംഘടിപ്പിച്ച പരിപാടിയിൽ വെച്ച് ഉയർന്ന നികുതിദായകനുള്ള ബഹുമതി പത്രം രജനീകാന്തിന് ലഭിച്ചു. നടന് വേണ്ടി മകൾ ഐശ്വര്യ രജനികാന്താണ് സർട്ടിഫിക്കറ്റ് കൈപ്പറ്റിയത്. തെലങ്കാന ഗവർണർ തമിഴിസൈ സൗന്ദരരാജൻ ചടങ്ങിൽ അദ്ധ്യക്ഷത വഹിച്ചു. തന്റെ അച്ഛന് ലഭിച്ച ആദരവിൽ ഐശ്വര്യ സന്തോഷം പങ്കുവെച്ചു.
നെൽസൺ ദിലീപ്കുമാർ സംവിധാനം ചെയ്യുന്ന ‘ജയിലർ’ ആണ് അണിയറയിൽ ഒരുങ്ങുന്ന രജനികാന്ത് ചിത്രം. ചിത്രത്തിൽ ഒരു പ്രധാന കഥാപാത്രത്തെ കന്നഡ നടൻ ശിവരാജ്കുമാറും അവതരിപ്പിക്കുന്നു. മുഴുനീള ആക്ഷന്‍ ചിത്രമായിരിക്കും ജയിലർ എന്നാണ് ലഭിക്കുന്ന വിവരം. തമിഴ്നടന്മാരായ ശിവകാര്‍ത്തികേയനും ചിമ്പുവും സിനിമയുടെ ഭാഗമായേക്കുമെന്നും സൂചനകളുണ്ട്.
