ആലപ്പുഴ : പ്രതിഷേധങ്ങൾക്കിടയിൽ ശ്രീറാം വെങ്കിട്ടരാമൻ ആലപ്പുഴ കളക്ടറായി ചുമതലയേറ്റു. ഇന്ന് രാവിലെ ആലപ്പുഴയിലെ ഓഫീസിൽ എത്തിയാണ് ചുമതലയേറ്റത്. ആലപ്പുഴ കളക്ടറായിരുന്ന ഡോ.രേണു രാജിനെ എറണാകുളം ജില്ല കളക്ടറായി മാറ്റിയ ഒഴിവിലാണ് ശ്രീറാമിന്റെ നിയമനം.
മാദ്ധ്യമപ്രവർത്തകൻ ബഷീറിന്റെ മരണവുമായി ബന്ധപ്പെട്ട കേസിലെ ഒന്നാം പ്രതിയാണ് ശ്രീറാം വെങ്കിട്ടരാമൻ. ശ്രീറാമിനെതിരെ കേസ് നിലനിൽക്കുന്ന സാഹചര്യത്തിൽ ജില്ല കളക്ടറായി നിയമിക്കുന്നതിനെതിരെ കോൺഗ്രസും മുസ്ലിം ലീഗും കൂടാതെ ചില ഇസ്ലാമിക സംഘടനകളും പ്രതിഷേധം ഉയർത്തിയിരുന്നു.
രാവിലെ ആലപ്പുഴ ജില്ലാ കളക്ടറേറ്റിന് മുൻപിൽ പ്രതിഷേധം സംഘടിപ്പിച്ചിരുന്നു. കളക്ടറേറ്റിന് പുറത്ത് യൂത്ത് കോൺഗ്രസ് പ്രവർത്തകർ ശ്രീറാമിനെ കരിങ്കൊടി കാണിച്ചു. പ്രതിഷേധിച്ച പ്രവർത്തകരെ പോലീസ് അടിച്ചോടിക്കുകയായിരുന്നു.
