ബർമിംഗ്ഹാം: കോമൺവെൽത്ത് ഗെയിംസിൽ മെഡൽ വേട്ട തുടർന്ന് ഇന്ത്യ. ഭാരോദ്വഹനത്തിൽ ബന്ധ്യാറാണി ദേവി വെള്ളിമെഡൽ നേടി. കോമൺവെൽത്ത് ഗെയിംസിൽ ഒരു സ്വർണം ഉൾപ്പെടെ നാല് മെഡലുകളാണ് ഇന്ത്യ സ്വന്തമാക്കിയത്.
55 കിലോ വിഭാഗത്തിലാണ് ബിന്ധ്യാറാണി മത്സരിച്ചത്. ഇതിൽ 202 കിലോ ഭാരം ഉയർത്തിയാണ് താരം വെള്ളിമെഡൽ സ്വന്തമാക്കിയത്. 203 കിലോ ഭാരം ഉയർത്തിയ നൈജീരിയയുടെ ആദിജത് അദനികെ ഒളരിനോയെയ്ക്കാണ് സ്വർണ മെഡൽ. ക്ലീൻ ആൻ ജെർക്കിൽ ബിന്ധ്യാറാണി 116 കിലോയും, സ്നാച്ചിൽ 86 കിലോയും ഭാരം ഉയർത്തി. ക്ലീൻ ആൻഡ് ജെർക്കിൽ രണ്ടാം ശ്രമത്തിൽ 114 കിലോ ഭാരം ഉയർത്തുന്നതിൽ ബിന്ധ്യാറാണി പരാജയപ്പെട്ടിരുന്നു.
ഭാരോദ്വഹനത്തിൽ സാങ്കേത് മഹാദേവ് സർഗാർ ആണ് രാജ്യത്തിന് ആദ്യ മെഡൽ നേടി തന്നത്. 55 കിലോ പുരുഷ വിഭാഗത്തിൽ വെള്ളി മെഡലാണ് സാങ്കേത് സ്വന്തമാക്കിയത്. പിന്നാലെ 61 കിലോ ഗ്രാം ഭാരോദ്വഹനത്തിൽ വെങ്കലം നേടിയ ഗുരുരാജ് പൂജാരിയാണ് ഇന്ത്യയ്ക്ക് രണ്ടാം മെഡൽ നേടിക്കൊടുത്തത്. മീരാബായ് ചാനുവിലൂടെ ഇന്ത്യയിലേക്ക് ആദ്യ സ്വർണം എത്തി. വനിതകളുടെ 49 കിലോഗ്രാം ഭാരോദ്വഹനത്തിലാണ് മീരാബായ് സ്വർണമണിഞ്ഞത്.
