ബിർമിംഗ്ഹാം: കോമൺവെൽത്ത് ഗെയിംസിൽ ഇന്ത്യയുടെ സ്വർണ വേട്ട തുടരുന്നു. ഭാരോദ്വഹനത്തിൽ ഇന്ത്യക്ക് രണ്ടാം സ്വർണ മെഡൽ നേട്ടം. 67 കിലോഗ്രാം വിഭാഗത്തിൽ ഇന്ത്യയുടെ ജെറമി ലാൽറിൻനുങ്കയാണ് സ്വർണം നേടിയത്.
ആകെ 300 കിലോ ഗ്രാം ഭാരമാണ് മത്സരത്തിൽ ജെറമി ഉയർത്തിയത്. ആദ്യ ക്ലീൻ ആൻഡ് ജെർക്ക് ശ്രമത്തിൽ തിരിച്ചടി നേരിട്ട ശേഷം ശക്തമായ തിരിച്ചു വരവാണ് ജെറമി നടത്തിയത്. മത്സരത്തിലുടനീളം പേശി വേദന ജെറമിയെ അലട്ടിയിരുന്നു. മൂന്നാം ശ്രമത്തിൽ കൈമുട്ടിന് പരിക്കേൽക്കുകയും ചെയ്തു. വേദന കടിച്ചമർത്തിയാണ് ഗെയിംസ് വേദിയിൽ ജെറമി ഇന്ത്യയുടെ അഭിമാനം ഉയർത്തിയത്.
സ്നാച്ചിൽ 140 കിലോ ഉയർത്തിയതോടെയാണ് ജെറമി ഗെയിംസ് റെക്കോർഡിട്ടത്. ക്ലീൻ ആൻഡ് ജെർക്കിൽ 160 കിലോയും ഉയർത്തിയ ജെറമിയുടെ പ്രകടനത്തിന്റെ സമീപത്തെങ്ങും എത്താൻ എതിരാളികൾക്ക് സാധിച്ചില്ല. കോമൺവെൽത്ത് ഗെയിംസിൽ ജെറമിയുടെ ആദ്യ സ്വർണ മെഡൽ നേട്ടമാണ് ഇത്.
