തിയറ്ററുകളിൽ നിറഞ്ഞ സദസ്സിൽ വിജയ കുതിപ്പ് തുടരുന്ന സുരേഷ് ഗോപി ചിത്രം പാപ്പന്റെ ഗ്ലിംപ്‌സ് അണിയറ പ്രവർത്തകർ പുറുത്തുവിട്ടു. ചിത്രത്തിൽ സുരേഷ് ഗോപിയും മകൻ ഗോകുൽ സുരേഷും തമ്മിലുള്ള സീനിന്റെ ഭാഗമാണ് പുറത്തിറങ്ങിയത്. സിനിമയിലെ അച്ഛനും മകനും തമ്മിലുള്ള കോംബിനേഷൻ സീനുകൾ ഏറെ പ്രശംസിക്കപ്പെട്ടിരുന്നു. ഇരുവരും തമ്മിലുള്ള സീനുകൾ എല്ലാം വലിയ കൈയ്യടികളോടെയാണ് ആരാധകരും സിനിമാ പ്രേമികളും സ്വീകരിച്ചത്. തിയറ്ററുകളിൽ വിജയ കൊടി പാറിക്കുന്ന ചിത്രത്തിന് പ്രേക്ഷകരെ വീണ്ടും എത്തിക്കാൻ പുറത്തുവിട്ട ഗ്ലിംപ്‌സിന് സാധിക്കും.
അതേസമയം, നാല് ദിവസം കൊണ്ട് മാത്രം പാപ്പൻ നേടിയത് 13.28 കോടി രൂപയാണ്. റിലീസ് ചെയ്ത ആദ്യം ദിവസം തന്നെ 3.16 കോടി ചിത്രം സ്വന്തമാക്കിയിരുന്നു. ഓഗസ്റ്റ് 4 ന് ജിസിസിലും ചിത്രം പ്രദർശനത്തിനെത്തും. ജിസിസി സെന്ററുകളിലേയ്‌ക്കുള്ള ബുക്കിംഗ് ആരംഭിച്ചിട്ടുണ്ട്. സുരേഷ് ഗോപിയുടെ ഏറ്റവും കളക്ഷൻ സ്വന്തമാക്കുന്ന ചിത്രമായിരിക്കും പാപ്പൻ. തൊണ്ണൂറുകളിൽ തിയറ്ററുകളെ ഇളക്കിമറിച്ച സുരേഷ്ഗോപി-ജോഷി കൂട്ടുക്കെട്ടിൽ വർഷങ്ങൾക്കിപ്പുറം വീണ്ടും സിനിമ എത്തിയതിന്റെ ആവേശത്തിലാണ് സിനിമാ പ്രേമികൾ.
വെള്ളിമൂങ്ങയ്‌ക്ക് ശേഷം ജിബു ജേക്കബ് സംവിധാനം ചെയ്ത ‘മേ ഹൂം മൂസ’യാണ് സുരേഷ് ഗോപിയുടെ അടുത്തതായി പുറത്തിറങ്ങുന്ന ചിത്രം. സുരേഷ് ഗോപിയുടെ 253-ാമത്തെ സിനിമായായ മേ ഹൂം മൂസയുടെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്തുവിട്ടിരുന്നു. കൊടുങ്ങല്ലൂർ, മലപ്പുറം, പൊന്നാനി, പുഞ്ച്, ജയ്പ്പൂർ, ഡൽഹി, വാഗ അതിര്‍ത്തി അടക്കം ഇന്ത്യയിലെ വിവിധ പ്രദേശങ്ങളിലാണ് സിനിമയുടെ ചിത്രീകരണം നടന്നത്. ചിത്രത്തിൽ മലപ്പുറംകാരനായ മൂസ എന്ന കഥാപാത്രമായാണ് സുരേഷ് ഗോപി എത്തുന്നത്.
