തിരുവനന്തപുരം: സംസ്ഥാനത്തെ റെഡ് അലർട്ടുകൾ പൂർണമായും പിൻവലിച്ചു. എറണാകുളം, ഇടുക്കി, കോട്ടയം ജില്ലകളിലായിരുന്നു റെഡ് അലർട്ടുണ്ടായിരുന്നത്. മഴയുടെ തീവ്രത കുറഞ്ഞതിന്റെ പശ്ചാത്തലത്തിലാണിത്.
നിലവിൽ 11 ജില്ലകളിൽ ഓറഞ്ച് അലർട്ടാണ് പ്രഖ്യാപിച്ചിരിക്കുന്നത്. പത്തനംതിട്ട മുതൽ കണ്ണൂർ വരെയുള്ള 11 ജില്ലകളിലാണ് ഓറഞ്ച് അലർട്ട്. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകളിലാണ് ഓറഞ്ച് അലർട്ടുള്ളത്. ഇതേ ജില്ലകളിൽ നാളെയും ഓറഞ്ച് അലർട്ടായിരിക്കുമെന്നാണ് കാലാവസ്ഥാ വകുപ്പിന്റെ വിലയിരുത്തൽ.
ജാഗ്രത കൈവിടാതെ സജ്ജരായിരിക്കുക എന്നതാണ് ഓറഞ്ച് അലർട്ടിലൂടെ ഉദ്ദേശിക്കുന്നത്. അതേസമയം തിരുവനന്തപുരം, കൊല്ലം, കാസർകോട് ജില്ലകളിൽ യെല്ലോ അലർട്ട് തുടരുന്നുണ്ട്. ഓഗസ്റ്റ് അഞ്ച് മുതൽ മഴയ്‌ക്ക് വലിയ രീതിയിൽ ശമനമുണ്ടാകുമെന്നാണ് കാലാവസ്ഥാ വകുപ്പ് വ്യക്തമാക്കുന്നത്.
