ബർമിങ്ങാം: കോമൺവെൽത്ത് ഗെയിംസിൽ പാകിസ്താനെതിരായ തകർപ്പൻ പ്രകടനത്തോടെ ഐസിസി ട്വന്റി 20 ബാറ്റിംഗ് റാങ്കിംഗിൽ മൂന്നാം സ്ഥാനത്തേക്ക് കയറി ഇന്ത്യൻ ബാറ്റർ സ്മൃതി മന്ഥാന. പാകിസ്താനെതിരെ 42 പന്തിൽ 63 റൺസ് നേടിയ മന്ഥാനയുടെ പ്രകടനം ഇന്ത്യക്ക് തകർപ്പൻ വിജയം സമ്മാനിച്ചിരുന്നു.
ന്യൂസിലൻഡ് താരം സോഫി ദെവിനെയെ നാലാം സ്ഥാനത്തേക്ക് പിന്തള്ളിയാണ് മന്ഥാന മൂന്നാം സ്ഥാനത്തേക്ക് കുതിച്ചത്. രണ്ടാം സ്ഥാനത്തുള്ള ഓസ്ട്രേലിയയുടെ ബെഥ് മൂണിയുമായി രണ്ട് റേറ്റിംഗ് പോയിന്റുകൾ മാത്രം പിന്നിലാണ് നിലവിൽ ഇന്ത്യൻ താരം. ഓസ്ട്രേലിയൻ താരം മെഗ് ലാനിംഗാണ് പട്ടികയിൽ ഒന്നാമത്.
2019ലും കഴിഞ്ഞ ഒക്ടോബറിലും മന്ഥാന മൂന്നാം സ്ഥാനത്ത് എത്തിയിരുന്നു. കോമൺവെൽത്ത് ഗെയിംസിലെ 6 മത്സരങ്ങൾക്ക് ശേഷമാണ് പുതിയ റാങ്കിംഗ് നിലവിൽ വന്നത്. ഓസ്ട്രേലിയക്ക് എതിരായ മത്സരത്തിൽ അർദ്ധ സെഞ്ച്വറി പ്രകടനം കാഴ്ച വെച്ച ഇന്ത്യൻ ക്യാപ്ടൻ ഹർമൻപ്രീത് കൗർ നാല് സ്ഥാനങ്ങൾ മെച്ചപ്പെടുത്തി പതിനാലാം റാങ്കിൽ എത്തി.
