എറണാകുളം: വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കാൻ വൈകിയ സംഭവത്തിൽ എറണാകുളം ജില്ലാ കളക്ടർ രേണു രാജിനെതിരെ പരാതി. കളക്ടർക്കെതിരെ നടപടി വേണമെന്ന് ആവശ്യപ്പെട്ട് ബാലാവകാശ കമ്മീഷനിലാണ് പരാതി ലഭിച്ചിരിക്കുന്നത്. സംഭവത്തിൽ കളക്ടർക്കെതിരെ നിയമ നടപടി വേണമെന്നാണ് ആവശ്യം.
ഹൈക്കോടതി അഭിഭാഷകനായ ബൈജു നോയൽ ആണ് പരാതിയുമായി ബാലാവകാശ കമ്മീഷനെ സമീപിച്ചിരിക്കുന്നത്. വൈകി പ്രഖ്യാപിച്ച അവധി കുട്ടികളിലും അദ്ധ്യാപകരിലും രക്ഷിതാക്കളിലും ആശയക്കുഴപ്പം ഉണ്ടാക്കി. ഇതിൽ നിയമനടപടി വേണമെന്നും പരാതിയിൽ പറയുന്നു.
നേരത്തെ രേണു രാജിനെതിരെ അഭിഭാഷകൻ ഹൈക്കോടതിയിൽ ഹർജി നൽകിയിരുന്നു. ഇതിന് പിന്നാലെയാണ് ബാലാവകാശ കമ്മീഷനിലും പരാതി ലഭിച്ചിരിക്കുന്നത്. വൈകിവന്ന വിധി എല്ലാവരിലും ആശയക്കുഴപ്പം ഉണ്ടാക്കിയെന്നും, അവധി പ്രഖ്യാപിക്കുന്നതിന് മാർഗ്ഗരേഖ തയ്യാറാക്കണമെന്നും ആവശ്യപ്പെട്ടായിരുന്നു ഹൈക്കോടതിയിൽ ഹർജി സമർപ്പിച്ചിരുന്നത്.
അതേസമയം സംഭവത്തിൽ ജില്ലാ കളക്ടർക്കെതിരെ ശക്തമായ പ്രതിഷേധമാണ് ഉയരുന്നത്. വൈകി അറിയിപ്പ് പുറപ്പെടുവിച്ചതിൽ കളക്ടർ ഇതുവരെ വിശദീകരണം നൽകിയിട്ടില്ല.
Comments