ന്യൂഡൽഹി: പ്രധാനമന്ത്രി നരേന്ദ്ര മോദിയെ അദ്ദേഹത്തിന്റെ വസതിയിൽ സന്ദർശിച്ച് പശ്ചിമ ബംഗാൾ മുഖ്യമന്ത്രി മമത ബാനർജി.നാല് ദിവസത്തെ സന്ദർശനത്തിനാണ് മമത ഡൽഹിയിൽ എത്തിയത്. ഇതിനിടയിൽ രാജ്യത്തെ പ്രമുഖരുമായി കൂടികാഴ്ച നടത്താനാണ് തീരുമാനം. ജി എസ് ടി കുടിശ്ശിക ഉൾപ്പെടുന്ന വിഷയങ്ങൾ സംസ്ഥാനത്തിന്റെ ആവശ്യം പ്രധാനമന്ത്രിയുമായി ചർച്ച ചെയ്‌തേക്കുമെന്ന് സൂചനയുണ്ട്.
രാഷ്‌ട്രപതി ദ്രൗപദി മുർമുവുമായി മമത കൂടികാഴ്ച നടത്തുമെന്നും അറിയിപ്പ് ലഭിച്ചിട്ടുണ്ട്. അതേസമയം പ്രധാനമന്ത്രിയുടെ അധ്യക്ഷതയിൽ അടുത്ത ദിവസം നടക്കാൻ പോകുന്ന ആയോഗ് ഗവേണിംഗ്‌ കൗൺസിൽ യോഗത്തിൽ മമതയും പങ്കെടുക്കുമെന്നാണ് വൃത്തങ്ങൾ നൽകുന്ന വിവരം. ഡൽഹിയിലെത്തിയ മമത തന്റെ പാർട്ടിയിലെ പാർലിമെന്റ് അംഗങ്ങളുമായി ചർച്ച നടത്തി.
2024ൽ നരേന്ദ്ര മോദി സർക്കാരിനെതിരെ പ്രതിപക്ഷ ഐക്യം ഉണ്ടാക്കാനാണ് മമത ഡൽഹിയിൽ എത്തിയിരിക്കുന്നതെന്ന് സൂചനയുണ്ട്. ഉപരാഷ്‌ട്രപതി തിരഞ്ഞെടുപ്പുമായി ബന്ധപ്പെട്ട് മാർഗരറ്റ് അൽവയുടെ പ്രചരണാർത്ഥം പ്രതിപക്ഷ പാർട്ടികളുമായി കൂടിക്കാഴ്ച നടത്താൻ ഇടയുണ്ടെന്നും പ്രാദേശിക മാദ്ധ്യമങ്ങൾ ചർച്ച ചെയ്യുന്നുണ്ട്.
