ഫ്ലോറിഡ: വെസ്റ്റിൻഡീസിനെതിരെ ഇന്ത്യയുടെ നാലാം ടി20 പോരാട്ടം ഇന്ന് അമേരിക്കയിലെ ഫ്ലോറിഡയിൽ നടക്കും. പരമ്പര നേടാനിറങ്ങുന്ന ഇന്ത്യയ്ക്ക് ഫ്ലോറിഡയിലെ ടോസ് നിർണ്ണായകമാകും. ആദ്യം ബാറ്റ് ചെയ്യുന്ന ടീമിന് മുൻതൂക്കമുള്ള പിച്ചാണ് ലോഡർഹിൽസിലെ സെൻട്രൽ ബ്രോവാർഡ് റീഡിയണൽ പാർക്ക് സ്റ്റേഡിയത്തിലുള്ളത്.
അഞ്ച് മത്സരങ്ങളുടെ പരമ്പരയിൽ ടീം ഇന്ത്യ 2-1ന് മുന്നിലാണ്. പതിവുപോലെ രാത്രി 8 മണിക്കാണ് മത്സരം ഇന്ത്യയിൽ കാണാനാവുക. പരമ്പരയിലെ രണ്ടും മൂന്നും മത്സരങ്ങൾ ടീമുകളുടെ കിറ്റ് എത്താതിരുന്നതിനാലാണ് തുടങ്ങാൻ വൈകിയത്. കഴിഞ്ഞ മൂന്ന് മത്സരങ്ങളിൽ തുടർച്ചയായി അവസരം നൽകിയിട്ടും 0,10,24 എന്ന നിലയിൽ തീർത്തും നിറം മങ്ങിയ ശ്രേയസ്സ് അയ്യർക്ക് പകരം സഞ്ജുവിനെ കളിപ്പിക്കാനുള്ള സാദ്ധ്യത കൂടുതലാണ്. സൂര്യകുമാറും മദ്ധ്യനിരയിൽ കളിക്കുമെന്നതിനാൽ ബാറ്റിംഗ് ലൈനപ്പിൽ മാറ്റം വരാൻ സാദ്ധ്യതയുണ്ട്. സഞ്ജു രോഹിതിനൊപ്പം ഓപ്പൺ ചെയ്യാനുള്ള സാദ്ധ്യതയും തള്ളാനാവില്ല.
ബൗളിംഗിൽ കഴിഞ്ഞ മത്സരത്തിൽ അവസാന ഓവറിൽ ആവോളം അടിവാങ്ങിക്കൂട്ടിയ ആവേശ് ഖാന് പകരം ഹർഷൽ പട്ടേലിന് അവസരമുണ്ടാകാനും സാദ്ധ്യതയുണ്ട്. ഹർഷലിന്റെ വരവ് ബാറ്റിംഗിന്റെ ആഴവും കൂട്ടും.
Comments