ജയ്പൂർ : ഹിന്ദു യുവാവിനെ വിവാഹം കഴിച്ചതിന് ഗർഭിണിയായ മകളെ കൊലപ്പെടുത്താൻ ശ്രമം. രാജസ്ഥാനിലെ ഭാരത്പൂരിലാണ് സംഭവം. നരേന്ദ്ര സൈനി എന്നയാളുടെ ഭാര്യ നഗ്മ ഖാനെയാണ് അവരുടെ പിതാവ് ഓട്ടോറിക്ഷയിടിച്ച് കൊലപ്പെടുത്താൻ ശ്രമിച്ചത്. സംഭവത്തിൽ പരാതിയുമായി ദമ്പതികൾ പോലീസിനെ സമീപിച്ചു.
ഇസ്ലാം ഖാൻ എന്നയാളാണ് ഹിന്ദു യുവാവിനെ വിവാഹം കഴിച്ച മകളെ കൊലപ്പെടുത്താൻ ശ്രമിച്ചത്. ഓട്ടോറിക്ഷ കയറ്റി കൊലപ്പെടുത്താനായിരുന്നു ശ്രമം. മൂന്ന് മാസം ഗർഭിണിയായ ഭാര്യയുമായി ആശുപത്രിയിൽ പോകുന്നതിനിടെയായിരുന്നു കൊലപാതകശ്രമം. എന്നാൽ യുവതി ഓടി രക്ഷപ്പെട്ടു. ഇതിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്. ഭാര്യയും ഭർത്താവും ജീവനും കൊണ്ട് ഓടുന്നത് വീഡിയോയിൽ കാണാം.
ഏറെ കാലത്തെ പ്രണയത്തിന് ശേഷമാണ് ഇരുവരും വിവാഹിതരായത്. യുവാവ് ഹിന്ദുവായത് കൊണ്ട് തന്നെ നഗ്മയുടെ വീട്ടിൽ വിവാഹത്തിന് സമ്മതിച്ചിരുന്നില്ല. അതുകൊണ്ട് ഒളിച്ചോടിയാണ് ഇരുവരും വിവാഹം കഴിച്ചത്. ഫെബ്രുവരി 22 ന് ആര്യ സമാജ്
മന്ദിരത്തിൽ വെച്ചാണ് ഇരുവരും വിവാഹിതരായത്. എന്നാൽ നഗ്മയുടെ കുടുംബം ഇവർക്കെതിരെ ഭീഷണി മുഴക്കിക്കൊണ്ട് എത്തി. തന്റെ മകളെ യുവാവ് തട്ടിക്കൊണ്ട് പോയതാണെന്നായിരുന്നു ഇസ്ലാം ഖാന്റെ പരാതി.
