കൊച്ചി : വിദ്യാർത്ഥികളുടെ പുകവലികൊണ്ട് സഹികെട്ട വീട്ടുകാരുടെ വ്യത്യസ്തമായ അറിയിപ്പ് ശ്രദ്ധ നേടുകയാണ്. മുന്നറിയിപ്പ് നൽകുന്ന പല ബോർഡുകളും സ്ഥാപിച്ചിട്ടും ഫലം കാണാതെ വന്നതോടെ വീട്ടുകാർ ”ചാണകമേറ് ഉറപ്പ്” എന്ന മുന്നറിയിപ്പ് നൽകിക്കൊണ്ട് ബോർഡ് സ്ഥാപിക്കുകയായിരുന്നു. കളമശ്ശേരി എച്ച്എംടി ജംഗ്ഷന് സമീപത്തെ ഒരു വീടിന് മുന്നിലാണ് വിചിത്രമായ ഈ ബോർഡ് പ്രത്യക്ഷപ്പെട്ടത്.
വീട്ടിൽ നിന്ന് റോഡിലേക്ക് ഇറങ്ങുന്ന നടപ്പാതയിൽ ഒത്തുകൂടി നിന്ന് വിദ്യാർത്ഥികൾ പുകവലിക്കുന്നത് പതിവായിരുന്നു. ഇതിനെതിരെ ” ഇത് പൊതുസ്ഥലമല്ല, മലിനമാക്കരുത്” എന്ന ബോർഡ് സ്ഥാപിച്ചു. ഇത് കണ്ടില്ലെന്ന് നടിച്ച് പ്രദേശം വീണ്ടും വൃത്തികേടാക്കാൻ വിദ്യാർത്ഥികൾ ശ്രമിക്കുകയായിരുന്നു.
പിന്നീട് നിങ്ങൾ സിസിടിവി നിരീക്ഷണത്തിലാണെന്നും പോലീസ് നിയന്ത്രണത്തിലാണെന്നുമുള്ള ബോർഡും സ്ഥാപിച്ചെങ്കിലും കാര്യമുണ്ടായില്ല. ഇതോടെയാണ് ” പുകവലിക്കരുത്, ചാണകമേറ് ഉറപ്പ്” എന്നെഴുതിയ ബോർഡ് സ്ഥാപിച്ചത്. എന്തായാലും ഈ ചിത്രം സമൂഹമാദ്ധ്യമങ്ങളിൽ ഹിറ്റായി മാറിയിരിക്കുകയാണ്.
Comments