മുംബൈ: വനവാസി സ്ത്രീയെ നിർബന്ധിത മതപരിവർത്തനത്തിന് ഇരയാക്കാൻ ശ്രമിച്ച മിഷണറിമാർ അറസ്റ്റിൽ. മിഷണറിമാരായ ക്ലെമന്റ് ഡി ബെല്ല, മറിയാമ്മ ഫിലിപ്പ്, പരംജീത്ത്, പരശുറാം ദിംഗ്ര എന്നിവരാണ് അറസ്റ്റിലായത്. പാൽഘഡ് സ്വദേശിനിയായ വനവാസി സ്ത്രീയെ ആണ് ഇവർ നിർബന്ധിച്ച് ക്രിസ്തു മതത്തിലേക്ക് പരിവർത്തനം ചെയ്യാൻ ശ്രമിച്ചത്.
ബന്ധുക്കൾ ഉപേക്ഷിച്ച സ്ത്രീ വീട്ടിൽ ഒറ്റയ്ക്കാണ് താമസിച്ചിരുന്നത്. ഇത് മനസ്സിലാക്കിയാണ് മിഷണറിമാർ ക്രിസ്തുമതം സ്വീകരിക്കാൻ ആവശ്യപ്പെട്ട് സ്ത്രീയെ സമീപിച്ചത്. മതം മാറിയാൽ പുതിയ വീട്, സൗജന്യ ചികിത്സ, പണം തുടങ്ങിയവയായിരുന്നു വാഗ്ദാനം. എന്നാൽ മതം മാറാൻ ഒരുക്കമല്ലെന്ന് സ്ത്രീ മിഷണറിമാരെ അറിയിച്ചു. ഇതോടെ ഇവരുടെ ഭീഷണിയും ആരംഭിച്ചു.
മതം മാറാൻ ആവശ്യപ്പെട്ട് മിഷണറിമാരുടെ നിർബന്ധം ശക്തമായതോടെ സ്ത്രീ വിവരം അയൽക്കാരെ അറിയിക്കുകയായിരുന്നു. അയൽവാസികൾ ഉടനെ വിവരം പോലീസിനെ അറിയിച്ചു. തുടർന്ന് നാല് പേരെയും അറസ്റ്റ് ചെയ്യുകയായിരുന്നു. ഇവർക്കെതിരെ ഇന്ത്യൻ ശിക്ഷാ നിയമത്തിലെ വിവിധ വകുപ്പുകൾ പ്രകാരമാണ് കേസ് എടുത്തത്.
