കൊൽക്കത്ത : തൃണമൂൽ കോൺഗ്രസിന് വീണ്ടും തിരിച്ചടി. പാർട്ടിയിലെ മുതിർന്ന നേതാവ് പവൻ കെ വർമ്മ രാജിവെച്ചു. എല്ലാത്തിനും നന്ദി അറിയിച്ചുകൊണ്ടാണ് വർമ്മ പാർട്ടി പ്രസിഡന്റിന് രാജി സമർപ്പിച്ചത്. ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്.
ദയവായി തന്റെ രാജി സ്വീകരിക്കണമെന്ന് അദ്ദേഹം പാർട്ടി നേതൃത്വത്തോട് ആവശ്യപ്പെട്ടു. തനിക്ക് നൽകിയ ഊഷ്മളമായ സ്വീകരണത്തിനും നിങ്ങളുടെ സ്നേഹത്തിനും മര്യാദയ്ക്കും നന്ദി. ഈ ബന്ധം തുടരാൻ ആഗ്രഹിക്കുന്നുവെന്നും എല്ലാ ആശംസകളും നേരുന്നുവെന്നും അദ്ദേഹം പറഞ്ഞു.
മുൻ ജെഡിയു എംപിയായ പവൻ കെ വർമ്മ കഴിഞ്ഞ വർഷമാണ് തൃണമൂൽ കോൺഗ്രസിൽ ചേർന്നത്. രാഷ്ട്രീയ സാഹചര്യങ്ങൾ കണക്കിലെടുത്ത് പ്രതിപക്ഷത്തെ ശക്തിപ്പെടുത്തേണ്ടതുണ്ട് എന്നാണ് അദ്ദേഹം പറഞ്ഞത്. എന്നാൽ പാർട്ടി പ്രതിസന്ധി നേരിട്ടതോടെ പവൻ വർമ്മ തൃണമൂൽ കോൺഗ്രസ് വിടുകയാണ്.
മുഖ്യമന്ത്രി മമത ബാനർജിക്ക് ഇത് കനത്ത തിരിച്ചടിയായിരിക്കുകയാണ്. അഴിമതിക്കേസിൽ പാർത്ഥ ചാറ്റർജിയും പശുക്കടത്ത് കേസിൽ അനുബ്രത മൊണ്ഡാലും അറസ്റ്റിലായിരിക്കുകയാണ്. ഇതിന് പിന്നാലെയാണ് നേതാക്കൾ പാർട്ടി വിടുന്നത്.
