പ്രണയബന്ധങ്ങളിൽ പിണക്കവും ഇണക്കവും സർവ്വസാധാരണമാണ്. പരസ്പരം ഒത്തുപോവാൻ കഴിയാതെ വരുന്നതോടെ ചിലർ ബന്ധങ്ങൾ പാതിവഴിയിലുപേക്ഷിക്കുന്നു. തന്നെ ഉപേക്ഷിച്ച് കാമുകൻ മറ്റൊരാളുടെ കൂടെ പോയാൽ എന്ത് ചെയ്യും. അവനെ ഓർത്ത് ദു:ഖിച്ചിരിക്കുകയോ പ്രതികരിക്കുകയോ പ്രതികാരം ചെയ്യുകയോ ചെയ്യും. എന്നാൽ വേറിട്ട രീതിയിലൂടെ കാമുകനോട് പകരം വീട്ടിയ ഒരു കാമുകിയുടെ കഥയാണ് ഇപ്പോൾ സമൂഹമാദ്ധ്യമങ്ങളിൽ വൈറലാവുന്നത്.
ഒരു മുഴുവൻ പേജ് പരസ്യമാണ് കാമുകി നൽകിയത്. ഇവിടെ ഒന്നുമല്ല അങ്ങ് ദൂരെ ഓസ്ട്രേലിയിലാണ് സംഭവം നടക്കുന്നത്. ഓസ്ട്രേലിയൻ പത്രമായ മക്കേ ആൻഡ് വിറ്റ്സണ്ടേ ലൈഫിന്റെ വായനക്കാരാണ് പത്രപരസ്യം കണ്ട് മൂക്കത്ത് വിരൽ വെച്ച് പോയത്. തന്നെ വഞ്ചിച്ച് പോയ ‘ബോയ് ഫ്രണ്ടിനെ കണക്കിന് ശകാരിക്കുകയാണ് അവൾ.
പരസ്യം ഇങ്ങനെയായിരുന്നു, ‘പ്രിയപ്പെട്ട സ്റ്റീവ്, നീ അവളിൽ സന്തോഷവാനാണെന്ന് ഞാൻ പ്രതീക്ഷിക്കുന്നു. നീ എന്തൊരു വൃത്തികെട്ട വഞ്ചകനാണെന്ന് ഇപ്പോൾ നഗരം മുഴുവൻ അറിയും. എന്ന്, ജെന്നി.’ ഇനി പരസ്യത്തിന് പണം ആര് കൊടുത്തു എന്നുകൂടി കേട്ടോ,നിങ്ങളുടെ ക്രെഡിറ്റ് കാർഡ് ഉപയോഗിച്ചാണ് ഞാൻ ഈ പരസ്യം വാങ്ങിയത്. എന്നായിരുന്നു പത്രപരസ്യം. എല്ലാവരെയും പോലെ ഈ രണ്ട് പേർ ആരാണെന്ന് അറിയാൻ വായനക്കാർക്കും ആഗ്രഹമുണ്ടായിരുന്നു. എന്നാൽ യുവതിയുടെ വ്യക്തി വിവരങ്ങൾ നൽകില്ലെന്ന് തറപ്പിച്ച് പറഞ്ഞിരിക്കുകയാണ് പത്രം.
