ദുബായ്: ആഡംബര സൗകര്യങ്ങൾക്ക് പേരുകേട്ട എമിറേറ്റ്സ് വിമാനങ്ങളിൽ സൗകര്യങ്ങൾ മെച്ചപ്പെടുത്തുന്നു. ഉൾവശം മാത്രം മോടിപിടിപ്പിക്കാൻ 200 കോടി ഡോളർ ചെലവഴിക്കും. 120 വിമാനങ്ങളാണ് ഇത്തരത്തിൽ പരിഷ്കരിക്കുക.
ഉപഭോക്താക്കൾക്ക് മികച്ച യാത്രാനുഭവം സമ്മാനിക്കുകയെന്ന ലക്ഷ്യത്തോടെയാണ് വൻതുക ചെലവിട്ട് എമിറേറ്റ്സ് വിമാനങ്ങൾ പരിഷ്കരിക്കുന്നത്. വിമാനങ്ങളുടെ ഇന്‍റീരിയർ പാനൽ മുതൽ ഫ്ലോർ വരെ മാറ്റം വരുത്തും. വിളമ്പുന്ന ഭക്ഷണത്തിന്‍റെ മെനുവും പരിഷ്കരിക്കുകയാണ്.
പ്രതിസന്ധികാലത്ത് ചെലവ് ചുരുക്കാനാണ് വിമാന കമ്പനികൾ ശ്രമിക്കുന്നതെങ്കിലും മികച്ച യാത്രാനുഭവം നൽകുന്നതിന് പ്രാധാന്യം നൽകുകയാണെന്ന് എമിറേറ്റ്സ് പ്രസിഡന്‍റ് സർ ടിം ക്ലാർക്ക് പറഞ്ഞു. ഫസ്റ്റ് ക്ലാസ് യാത്രക്കാർക്ക് സിനിമ ആസ്വദിക്കുന്നതിനൊപ്പം ഭക്ഷണമെനുവും മികച്ചതാക്കും.
ദുബായിൽ അടുത്തിടെ നിർമിച്ച ലോകത്തിലെ ഏറ്റവും വലിയ വെർട്ടിക്കൽ ഫാമായ ബസ്റ്റിക്കാനയിലെ പച്ചക്കറികളും ഇലകളും വിമാനത്തിൽ ലഭ്യമാക്കുന്ന വിഭവങ്ങളുടെ ഭാഗമാകുമെന്നും അധികൃതർ അറിയിച്ചു.
