ഗുവാഹട്ടി: കേന്ദ്ര- സംസ്ഥാന സർക്കാരുകളുടെ പ്രവർത്തനത്തിൽ അസമിലെ പ്രതിപക്ഷവും സംതൃപ്തരെന്ന് ബിജെപി അസം സംസ്ഥാന അദ്ധ്യക്ഷൻ ഭബേഷ് കലിത. ബിജെപി സർക്കാരുകളുടെ പ്രവർത്തനങ്ങൾക്ക് ഐക്യദാർഢ്യം പ്രകടിപ്പിച്ച് പ്രതിപക്ഷത്ത് നിന്നും കൂടുതൽ എം എൽ എമാർ പാർട്ടിയിലേക്ക് എത്തുമെന്ന് അദ്ദേഹം പറഞ്ഞു.
കോൺഗ്രസിൽ നിന്ന് മാത്രമല്ല, മറ്റ് പാർട്ടികളിൽ നിന്നും കൂടുതൽ നേതാക്കൾ ബിജെപിയിലേക്ക് എത്തും. കേന്ദ്രത്തിൽ നരേന്ദ്ര മോദിയുടെ ഭരണവും സംസ്ഥാനത്ത് ഹിമന്ത ബിശ്വ ശർമ്മയുടെ ഭരണവും വികസനോന്മുഖമാണ്. ജനങ്ങളുടെ മനസ്സറിയുന്ന രാഷ്ട്രീയ നേതാക്കൾക്ക് അവരുടെ അഭിരുചികളിൽ നിന്നും മാറി നടക്കാനാവില്ലെന്നും കലിത പറഞ്ഞു. 2024 ലെ ലോക്സഭാ തിരഞ്ഞെടുപ്പിൽ സംസ്ഥാനത്ത് ബിജെപി മികച്ച പ്രകടനം കാഴ്ച വെക്കുമെന്നും ഭബേഷ് കലിത വ്യക്തമാക്കി.
2021 നിയമസഭാ തിരഞ്ഞെടുപ്പിന് ശേഷം അസമിൽ നിരവധി പ്രതിപക്ഷ എം എൽ എമാർ ബിജെപിയിൽ ചേർന്നിരുന്നു. ഇവരെല്ലാം ഉപതെരഞ്ഞെടുപ്പുകളിലും വിജയിച്ചിരുന്നു. കഴിഞ്ഞ രാഷ്ട്രപതി തിരഞ്ഞെടുപ്പിലും അസമിൽ നിന്നും എൻഡിഎ സ്ഥാനാർത്ഥിക്ക് പ്രതീക്ഷിച്ചതിലും കൂടുതൽ വോട്ടുകൾ ലഭിച്ചിരുന്നു. രാജ്യസഭാ തിരഞ്ഞെടുപ്പിലും അസമിലെ സീറ്റുകളിൽ ബിജെപി സ്ഥാനാർത്ഥികൾ വിജയിച്ചിരുന്നു.
