തിരുവനന്തപുരം: സ്വധർമ്മാചരണത്തിലൂടെ സ്വത്വം വീണ്ടെടുക്കാനുള്ള പ്രതിജ്ഞയാണ് ഈ വർഷത്തെ ശ്രീകൃഷ്ണ ജയന്തിദിന സന്ദേശമെന്ന് ബാലഗോകുലം സംസ്ഥാന അദ്ധ്യക്ഷൻ ആർ. പ്രസന്ന കുമാർ. നമ്മെ നാമാക്കി നിലനിർത്തുന്ന അടിസ്ഥാനമൂലകങ്ങളെ നഷ്ടപ്പെടുത്തരുത്. മാതൃഭാഷയും മാതൃദേശവും അമ്മയ്ക്ക് തുല്യമാണ്. നാട്ടുപാരമ്പര്യമനുസരിച്ചുള്ള ജീവിതശൈലി നാം തിരിച്ചെടുക്കുകയും വേഷം, ഭാഷ, ഭക്ഷണം, പെരുമാറ്റം ഇവയിലെ ഭാരതീയത തിരിച്ചറിയണമെന്നും അദ്ദേഹം പറഞ്ഞു.
ധർമ്മസംസ്ഥാപനത്തിനായി ഭൂമിയിൽ പിറന്ന പൂർണാവതാരമാണ് ഭഗവാൻ ശ്രീകൃഷ്ണൻ. സ്വധർമ്മേ നിധനം ശ്രേയ പരധർമ്മോ ഭയാവഹ എന്ന ഗീതാസന്ദേശമാണ് നമ്മുടെ സ്വാതന്ത്ര്യ സമരത്തെ നയിച്ചത്. അതുകൊണ്ടുതന്നെ സ്വധർമ്മാചരണത്തിലൂടെ സ്വത്വം വീണ്ടെടുക്കാനുള്ള പ്രതിജ്ഞയാണ് ഈ വർഷത്തെ സന്ദേശമെന്ന് അദ്ദേഹം പറഞ്ഞു.
കേരളത്തെ കണ്ണന്റെ കളിത്തൊട്ടിലാക്കുന്ന മഹാശോഭായാത്രകളൊരുക്കി ബാലഗോകുലം ശ്രീകൃഷ്ണജയന്തി ബാലദിനമായി ആഘോഷിക്കുന്നു. ഓരോ ഉണ്ണിയും കണ്ണനായി വളരണമെന്നുള്ള ഭവ്യമായ സങ്കൽപമാണ് ശോഭായാത്രയ്ക്കുള്ളത്. ഇത്തവണ സംസ്ഥാനത്തെ പതിനായിരത്തോളം കേന്ദ്രങ്ങളിലായി വിപുലമായ ശോഭായാത്രകളാണ് ബാലഗോകുലത്തിന്റെ നേതൃത്വത്തിൽ സംഘടിപ്പിക്കുന്നത്.
Comments