ന്യൂഡൽഹി: കോൺഗ്രസിന് വളരെ അപകടകരമായ ചിന്തകളാണുള്ളതെന്ന അഭിപ്രായവുമായി ബിജെപി ദേശീയ ജനറൽ സെക്രട്ടറി സിടി രവി. പ്രതിപക്ഷ നേതാവ് സിദ്ധരാമയ്യയുടെ പ്രസ്താവനയ്‌ക്കെതിരെയാണ് പരാമർശവുമായി സിടി രവി എത്തിയത്. മുസ്ലീം പ്രദേശങ്ങളിൽ സവർക്കരുടെ പോസ്റ്റർ പതിക്കുന്നതെന്തിന് എന്നായിരുന്നു സിദ്ധരാമയ്യയുടെ പ്രസ്താവന.
ജിന്നയുടെ മനോഭാവത്തിലാണ് കോൺഗ്രസിന്റെ ചിന്തയെന്ന് സി ടി രവി ആരോപിച്ചു. ഇന്ന് മുസ്ലീം പ്രദേശങ്ങളിൽ പോസ്റ്ററുകൾ പതിക്കുന്നതിനെയാണ് കോൺഗ്രസ് ചോദ്യം ചെയ്യുന്നത്. നാളെ മുസ്ലീം പ്രദേശത്ത് ത്രിവർണ്ണ പതാക ഉയർത്തുന്നതിനെ കുറിച്ച് അവർ തർക്കിക്കുമെന്നും ബിജെപി നേതാവ് കൂട്ടിച്ചേർത്തു.മുസ്ലീം പ്രദേശം ഈ രാജ്യത്തിന്റെ ഭാഗമാണെന്നും സവർക്കറുടെ ഫോട്ടോ സ്ഥാപിക്കുന്നതിന് നിരോധനമേർപ്പെടുത്തുന്നതിന്റെ ആവശ്യമെന്താണെന്നും സിടി രവി ചോദിച്ചു. തിരഞ്ഞെടുപ്പ് കണക്കിലെടുത്ത് ഇത്തരം പരാമർശങ്ങൾ നടത്തരുതെന്നും അദ്ദേഹം കോൺഗ്രസ് നേതാവിനോട് ആവശ്യപ്പെട്ടു.
സ്വാതന്ത്ര്യ ദിനത്തിൽ ശിവമോഗയിൽ വിനായക് ദാമോദർ സവർക്കറുടെ പോസ്റ്ററുകൾ സ്ഥാപിക്കാൻ ആളുകൾ ശ്രമിക്കുകയും എന്നാൽ മറ്റൊരു സംഘം ടിപ്പു സുൽത്താന്റെ ബാനറുകൾ സ്ഥാപിക്കുന്നതിനായി സവർക്കറുടെ ബാനറുകൾ കീറാൻ ശ്രമിച്ചു. തുടർന്ന് പ്രദേശത്ത് സംഘർഷാവസ്ഥ ഉടലെടുത്തിരുന്നു. വർഗീയ സംഘർഷം സൃഷ്ടിച്ചെന്ന് ബിജെപിയെ സിദ്ധരാമയ്യ കുറ്റപ്പെടുത്തിയിരുന്നു.ഇതിനുളള മറുപടിയാണ് ബിജെപി ദേശീയ ജനറൽസെക്രട്ടറി നൽകിയത്.
