ഡെറാഡൂൺ: ഡെറാഡൂൺ ജില്ലയിലെ റായ്പൂർ ബ്ലോക്കിൽ മേഘവിസ്ഫോടനം. ഇന്ന് പുലർച്ചെ 2.45-നാണ് മേഘവിസ്ഫോടനമുണ്ടായത്. രക്ഷാപ്രവർത്തനം ദ്രുതഗതിയിൽ നടക്കുന്നതായി ഭരണകൂടം വ്യക്തമാക്കി.
സംഭവ സ്ഥലത്ത് സംസ്ഥാന ദുരന്ത നിവാരണ സേനയും എൻഡിആർഎഫും സംയുക്തമായാണ് രക്ഷാപ്രവർത്തനങ്ങൾ ഏകോപിപ്പിക്കുന്നത്. ഗ്രാമത്തിൽ കുടുങ്ങിയ എല്ലാവരെയും രക്ഷപ്പെടുത്തിയതായും സേന അറിയിച്ചു. ഗ്രാമവാസികളിൽ ചിലർ അടുത്തുള്ള റിസോർട്ടിൽ അഭയം പ്രാപിച്ചെന്നും സേന കൂട്ടിച്ചേർത്തു. കനത്ത മഴയാണ് പ്രദേശത്ത് പെയ്യുന്നത്. ഡെറാഡൂണിലെ പ്രസിദ്ധമായ തപ്കേശ്വർ മഹാദേവ് ക്ഷേത്രത്തിന് സമീപം ഒഴുകുന്ന താമസ നദി കരകവിഞ്ഞു.മാതാ വൈഷ്ണോദേവി ഗുഹായോഗ ക്ഷേത്രവും തപകേശ്വർ മഹാദേവ് ക്ഷേത്രവുമായുള്ള ബന്ധം നഷ്ടപ്പെട്ടതായി ക്ഷേത്ര ആചാര്യൻ ബിപിൻ ജോഷി പറഞ്ഞു. നാശനഷ്ടങ്ങളോ ആളപായമോ നിലവിൽ റിപ്പോർട്ട് ചെയ്തിട്ടില്ലെന്ന് വ്യക്തമാക്കി.
ജമ്മു കശ്മീരിലെ റിയാസി ജില്ലയിലെ കത്ര ടൗണിലെ മാതാ വൈഷ്ണോ ദേവി ക്ഷേത്രത്തിന് സമീപമുണ്ടായ കനത്ത മഴയും വെള്ളപ്പൊക്കത്തിന് കാരണമായതായി ദുരന്ത നിവാരണ സേന അറിയിച്ചു. മഴയെ തുടർന്ന് തീർത്ഥാടകർക്ക് നിയന്ത്രണം ഏർപ്പെടുത്തി. മാതാ വൈഷ്ണോദേവി ക്ഷേത്രത്തിൽ തീർത്ഥാടകർക്ക് മല കയറാൻ അനുമതിയില്ല. കത്രയിൽനിന്ന് വൈഷ്ണോദേവി ക്ഷേത്രത്തിലേക്കുള്ള പാത അടച്ചു.
