മലയാളികളുടെ എക്കാലത്തെയും പ്രിയപ്പെട്ട ചിത്രമാണ് താര രാജാക്കന്മാരെ ഒരുമിച്ച് സ്ക്രീനിലെത്തിച്ച ഫാസിലിന്റെ ഹരികൃഷ്ണൻസ്. മോഹൻലാൽ ആരാധകർക്കും മമ്മൂട്ടി ആരാധകർക്കും ഒരുപോലെ തങ്ങളുടെ താരങ്ങളുടെ പ്രകടനം കണ്ട് കയ്യടിക്കാൻ സാധിക്കുന്ന ചിത്രമാണിത്. ഒരുകാലത്ത് തിയറ്ററുകളെ ഇളക്കി മറിച്ച സിനിമയുടെ രണ്ടാം ഭാഗം ഒരുങ്ങുന്നു എന്ന വാർത്തയാണ് ഇപ്പോൾ സമൂഹമാദ്ധ്യമങ്ങളിൽ നിറയുന്നത്.
ചിത്രത്തിന്റെ തിരക്കഥ ഫാസിൽ എഴുതാൻ ആരംഭിച്ചുവെന്നും മറ്റൊരു കേസുമായി ഹരികൃഷ്ണന്മാർ ഉടൻ തിരികെ എത്തുമെന്നുമാണ് ഔദ്യോഗികമല്ലാത്ത റിപ്പോർട്ടുകൾ. സമൂഹമാദ്ധ്യമങ്ങൾ ഇതു സംബന്ധിച്ച ചൂടേറിയ ചർച്ചകൾ നടക്കുന്നതിനിടെയാണ് മോഹൻലാലും മമ്മൂട്ടിയും ഒരുമിച്ചുള്ള ചിത്രം പുറത്തു വന്നിരിക്കുന്നത്. താര രാജാക്കന്മാരോടൊപ്പം നിർമ്മാതാക്കളായ ആന്റണി പെരുമ്പാവൂർ, ജോർജ്ജ്, ആന്റോജോസഫ് എന്നിവരും ഉണ്ട്. ഇതോടെ ചിത്രം വരുമെന്ന അഭ്യൂഹങ്ങൾ സമൂഹമാദ്ധ്യമങ്ങളിൽ ശക്തമായിരിക്കുകയാണ്. എന്നാൽ പ്രചരിക്കുന്നത് ഏറ്റവും പുതിയ ചിത്രമാണോ എന്നും വ്യക്തമല്ല.
ഹാസ്യത്തിന്റെ മേമ്പൊടി കലർത്തി 1998-ൽ പുറത്തിറങ്ങിയ ചിത്രത്തിൽ മമ്മൂട്ടിയും മോഹൻലാലും മത്സരിച്ച് അഭിനയിക്കുന്നത് കാണാം. പ്രകടനങ്ങൾ കൊണ്ട് ഇരുവരും മലയാളികളുടെ മനസ്സ് കീഴടക്കിയതോടെ ചിത്രം വലിയ ഹിറ്റായി മാറി. ബോളിവുഡ് താരം ജൂഹി ചൗളയായിരുന്നു ഇരുവരുടെയും നായിക. എന്തായാലും മലയാള സിനിമയുടെ തലതൊട്ടപ്പന്മാർ വീണ്ടും കൈകോർത്ത് ബിഗ് സ്ക്രീനിൽ എത്തുമെന്ന പ്രതീക്ഷയിൽ ആരാധകരും സിനിമാ പ്രേമികളും കാത്തിരിപ്പ് ആരംഭിച്ചു കഴിഞ്ഞു.
Comments