ബംഗളൂരു: കർണാടകയിൽ ഹിന്ദു മൂല്യങ്ങൾ മുറുകെ പിടിച്ച് മുസ്ലീം കുടുംബം. ഹുദോ കോളനയിലെ ബദേഖാൻ കുടുംബമാണ് ഹിന്ദു ആചാരങ്ങളും പിന്തുടരുന്നത്. ഇതിന്റെ ഭാഗമായി അഷ്ടമി രോഹിണി ദിനത്തിൽ കുടുംബാംഗങ്ങൾ സ്വാമിജി സ്വരൂപാനന്ദയെ ദർശിച്ച് പാദപൂജ നടത്തി.
ദർവാദിലെ ആശ്രമത്തിൽ എത്തിയായിരുന്നു ബദേഖാൻ കുടുംബം പാദപൂജ നടത്തിയത്. കാലങ്ങളായി സ്വാമിജിയെ ആരാധിച്ചുപോരുന്നതായി സ്വകാര്യ സ്ഥാപനത്തിൽ ഡ്രൈവർ ആയി ജോലി ചെയ്യുന്ന സിക്കന്ദർ ബദേഖാൻ പറഞ്ഞു. വർഷങ്ങളായി സ്വാമിജിയുടെ ആശ്രമത്തിൽ എത്തി ദർശനം നടത്താറുണ്ട്. ഹിന്ദു വിശ്വാസത്തെയും തങ്ങൾ ആരാധിക്കുന്നു.
ഇസ്ലാം മതത്തിനൊപ്പം തങ്ങൾ മറ്റ് മതങ്ങളുടെ ആചാര അനുഷ്ഠാനങ്ങളും പിന്തുടരാറുണ്ട്. ഇതിനെതിരെ നിരവധി ബന്ധുക്കൾ ശക്തമായ എതിർപ്പുമായി രംഗത്തുവന്നിരുന്നു. എന്നാൽ മറ്റ് മതങ്ങളും പിന്തുടരുന്നതിൽ തെറ്റില്ലെന്നാണ് തങ്ങൾ കരുതുന്നത്. ഇനിയും അത് തുടരുമെന്നും അദ്ദേഹം വ്യക്തമാക്കി.
ശ്രാവണ മാസത്തിൽ സ്വാമിജി തങ്ങളുടെ വീട് സന്ദർശിക്കാറുണ്ട്. നിരവധി പേർ അവിടെയെത്തി അദ്ദേഹത്തെ കാണാറുമുണ്ട്. ഇതെല്ലാം തങ്ങൾക്ക് ഏറെ സന്തോഷം നൽകുന്നതാണെന്നും സിക്കന്ദർ ബദേഖാൻ വ്യക്തമാക്കി.
